2023 წლის დეკემბრიდან რაჭისკენ გავეშურეთ. ოჯახებს ამბროლაურსა და ონში ვესტუმრეთ და ამ დრომდე 50 მოსწავლეს გადავეცით ლეპტოპი. ჩვენი ერთგული მხარდამჭრების დახმარებით მათ ინტერნეტსაც ვუფინანსებთ. მოვიარეთ სოფელი უწერა, ხვანჭკარა, ხოტევი, ჟოშხა, ჭრებალო, საკეცია, ძირაგეული, ლაგვანთა, ლანჩთა, ღები, ღარი, ქვიშარი და ჯინჭვისი. რაჭა უკვე ჩვენი სიყვარულიც გახდა!  ​

2021 წლის თებერვალში ახალი რეგიონის ჩართვა გადავწყვიტეთ და იმერეთში მოსწავლეების გახარება ჭიათურითა და წყალტუბოთი (იძულებით გადაადგილებულ პირთა დასახლებები) დავიწყეთ. წლის მანძილზე პროექტთან 251 უფროსკლასელის დამეგობრება მოვახერხეთ. შემდეგ 2022 წელსაც დავბრუნდით და იანვარი-ივლისის ჩათვლით უკვე ბაღდათში, ხონში, ზესტაფონსა და ვანში 117 მოსწავლეს გადავეცით კომპიუტერი და ჩავურთეთ ინტერნეტი! 2023 წელსაც არ ჩაუვლია იმერეთის გარეშე - ხარაგაულსა და ბაღდათში 126 ოჯახს ვეწვიეთ. იხილეთ ფოტოები ​

ფურტიო, ჩანჩხალო, ნიგაზეული, ნენია, ბუთურაული, ლომინაური - ეს იმ სოფლების არასრული ჩამონათვალია, რომლებშიც 2022 წლის მაისიდან ნოემბრის ჩათვლით მოსწავლეები ჩავრთეთ. მაღალმთიან აჭარაში შუახევისა და ქედის სოფლებს ვესტუმრეთ და ყოველ ჯერზე დიდებული ბუნებითა და სტუმართმოყვარე ოჯახებით აღფრთოვანებულები ვბრუნდებოდით! ლეპტოპები და ინტერნეტთან წვდომა 193 ბავშვამდე მივიტანეთ! მუშაობას მომდევნო თვეებშიც გავაგრძელებთ - ჩვენი გუნდის წევრებს მიუვალი მთების მწერვალებთან ჯერ კიდევ ბევრი ოჯახი ჰყავთ გასახარებელი. იხილეთ ფოტოები  ​

2019 წელს თებერვლიდან მაისის ჩათვლით „ინტელკომ ჯგუფისა“ და „ჩართეს“ დონორების დახმარებით ქვემო ქართლის რეგიონში, თეთრიწყაროს მუნიციპალიტეტში (დაბა მანგლისი, ახალსოფელი, ალგეთი, ხაიში, ასურეთი, ბოგვი) 47 სოციალურად დაუცველ უფროსკლასელს ჩავურთეთ ინტერნეტი და გადავეცით კომპიუტერები. COVID-19 პანდემიის პერიოდში კი, 2020 წლის აპრილის პირველ კვირაში 46 მოსწავლეს ჩავუტანეთ ლეპტოპი და ჩავურთეთ ინტერნეტი. 20 ქრომბუკი დააფინანსა ფონდი „პროდემოსისა“ და სექტორი 3-ის ერთობლივმა ინიციატივამ, მოძრაობა „შენმოქმედმა“, რომელიც საქართველოს ყველა ოჯახისთვის კომპიუტერისა და ინტერნეტის მიწოდებას ისახავს მიზნად! იხილეთ ფოტოები ​

2022 წლის მარტში ასპინძის სოფლებს ვეწვიეთ და ჩვენი მხარდამჭერების შემოწირულობით ნაყიდი ლეპტოპებით 33 მოსწავლე გავახარეთ, მაისში კიდევ 12. მესხეთში 2023 წელსაც გავაგრძელეთ მოსწავლეების "ჩართვა" და ჯერჯერობით 6 მოვასწარით. იხილეთ ფოტოები  ​

2022 წელს კვლავ ვეწვიეთ ოზურგეთს და კიდევ 34 უფროსკლასელს გადავეცით კომპიუტერი. „ჩართე“ პანდემიის პერიოდში მოსწავლეების ჩართვაზე აქტიურად მუშაობს.  2020 წლის ივნისში გურიაში 41 მოსწავლეს გადავეცით კომპიუტერი. მანამდე, 2018 წლის ნოემბერში, ლეპტოპებით დატვირთული მანქანით გავემართეთ ოზურგეთის მუნიციპალიტეტში (ქალაქი ოზურგეთი, სოფლები: შრომა, ქვედა ბახვი, ლიხაური, დაბა ნასაკირალი, ცხემლისხიდი, დაბა ნარუჯი), 36 სოციალურად დაუცველ უფროსკლასელს ვესტუმრეთ. დეკემბერში კი, ჩოხატაურის მუნიციპალიტეტში (სოფლები: ერკეთი, ბუკნარი, დაბლაციხე, საჭამიასერი, ქვენობანი, კოხნარი, ჩაისუბანი) 39 ოჯახის კომპიუტერითა და ინტერნეტით უზრუნველყოფა შევძელით. იხილეთ ფოტოები

დონორების შემოწირულობებით ჩვენი გუნდი ჩართული მოსწავლეებისთვის საგანმანათლებლო ტრენინგებსაც უზრუნველყოფს. სახალისო და მეგობრულ გარემოში, ტრენინგებზე მოსწავლეებს ინტერნეტში არსებულ სასარგებლო რესურსებს ვუზიარებთ, სწორი და ყალბი ინფორმაციის გარჩევას ვასწავლით. მედიაწიგნიერების გარდა, პრიორიტეტულად ფინანსური განათლებაც მივიჩნიეთ. ლანჩხუთში, ჩოხატაურში, თეთრიწყაროში, ხაშურში, ზუგდიდში, თბილისსა და კიდევ რამდენიმე ქალაქში მოსწავლეები უკვე შევკრიბეთ! იხილეთ ფოტოები და გაეცანით ჩვენი ტრენინგების გავლენის კვლევას! ​

სამეგრელოში 2021 წელსაც (მარტი-ივნისი) დავბრუნდით! აბაშის რაიონში, ფოთსა და ზუგდიდის რაიონში 98 მოსწავლეს გადავეცით კომპიუტერი, ჩავურთეთ ინტერნეტი და მივეცით წვდომა საგანმანათლებო რესურსებზე. მანამდე, 2020 წლის იანვარში Glovo-ს მხარდაჭერით ანაკლიასა და ლიაში 15 მოსწავლე გავახარეთ კომპიუტერით. კონფლიქტისპირას მცხოვრები უფროსკლასელებიც არ დაგვიტოვებია უყურადღებოდ. ინფორმაციული ვაკუუმის გარღვევა, რაც სწორედ ინტერნეტს შეუძლია, მათ ყველაზე მეტად სჭირდებათ. იხილეთ ფოტოები  ​

პანდემიის პერიოდში გაათმაგებული ძალებით ვმუშაობთ, შედეგად კი კახეთის ჩართვაც დავიწყეთ! 2020 წლის აპრილ-ივნისში სად აღარ ვიყავით: დედოფლისწყარო, საგარეჯო, ახმეტა, სიღნაღი, თელავი. კერძო და კორპორატიული დონორების მხარდაჭერით 209 უფროსკლასელს გადავეცით ლეპტოპი, მოსწავლეების ინტერნეტის გადასახადს კი ჩვენი ყოველთვიური დონორები აფინანსებენ. 2021 წლის ნოემბერი-დეკემბერი კვლავ გავაგრძელეთ კახეთში მუშაობა და ლაგოდეხის რაიონში კიდევ 92 მოსწავლეს გადავეცით კომპიუტერი. იხილეთ ფოტოები ​

შიდა ქართლში ჩვენი გუნდი 2020 წლის დეკემბრიდან 2021 წლის მაისამდე სხვადასხვა პერიოდში მუშაობდა. 3 თვის მანძილზე კასპში 13 დასახლებას ვესტუმრეთ და კომპიუტერითა და ინტერნეტით 47 უფროსკლასელის გახარება მოვახერხეთ. ივლისი-ნოემბერი ქარელის „ჩართვას“ დავუთმეთ. ქრომბუკები მთლიანად პროექტის ერთგული დონორების შემოწირულობით შევიძინეთ და თამამად გავემგზავრეთ მოსწავლეების გასახარებლად. ქარელში 86 მოსწავლეს უკვე აქვს წვდომა კომპიუტერსა და ონლაინ რესურსებზე. იხილეთ ფოტოები ​

2019 წლის იანვარში „ჩართეს“ დონორების დახმარებით, უკანა ფშავში, სოფელ შუაფხოში, 5 სოციალურად დაუცველ უფროსკლასელს გადავეცით კომპიუტერები და ინტერნეტისთვის განკუთვნილი მაგთის 3G მოდემები. ჩვენი ონლაინ დონორების დახმარებით მათ ინტერნეტის ყოველთვიურ გადასახადსაც დავუფინანსებთ. იხილეთ ფოტოები ​

2019 წლის აგვისტოში BDO Georgia-სა და ონლაინ დონორების მხარდაჭერით 19 მოსწავლეს გადავეცით ქრომბუქი და ჩავურთეთ ინტერნეტი. 2019 წლის სექტემბერში ახმეტაში მედიაწიგნიერებაზე, ფინანსურ და ონლაინ განათლებაზე ტრენინგიც ჩავატარეთ. იხილეთ ფოტოები ​

გადავწყვიტეთ კომპიუტერები იმ ოჯახებისთვისაც გადაგვეცა, რომლებიც ომის ცხელ წერტილებთან ყველაზე ახლოს მდებარე სოფლებში ცხოვრობენ. საოკუპაციო ხაზთან ჩვენი პირველი დანიშნულების ადგილი სოფელი დვანი იყო - საქართველოს ბანკის მხარდაჭერით, 2018 წელს 19 ოჯახს გადავეცით კომპიუტერი! შემდეგ ხაშურში ორი წლის განმავლობაში სხვადასხვა დროს ვიმუშავეთ და ჯამში 48 მოსწავლის ლეპტოპით უზრუნველყოფა მოვახერხეთ. ამით არ გავჩერებულვართ - 2019 წლის ივნისში ზუგდიდის რაიონის კონფლიქტისპირა სოფლებში თეგეტა აკადემიის მხარდაჭერით 38 სოციალურად დაუცველი მოსწავლე გავახარეთ. სამეგრელოშივე გავემართეთ ქალაქ ჯვარისკენ, სადაც მოსახლეობის ნახევარი აფხაზეთიდანაა დევნილი - ლეპტოპი 19 უფროსკლასელს ჩავუტანეთ. ​2019 წლის დეკემბერსა და 2020 წლის თებერვალში კი გორს ვესტუმრეთ: “კავკასუს ონლაინის”, “ინსორსისა” და “კერძო დონორების დახმრებით 92 უფროსკლასელი ჩავრთეთ! იხილეთ ფოტოები ​

2018 წელს ქალაქ ბორჯომსა და მის შემოგარენში არსებულ სოფლებში (ყვიბისი, ჭობისხევი, ბალანთა, დაბა ბაკურიანი, წაღვერი, ახალდაბა, რველი) კომპანია "ბორჯომის" დახმარებით 28 სოციალურად დაუცველ მოსწავლეს გადავეცით კომპიუტერი, რომლებსაც ჩვენი შემომწირველები ყოველთვიური ინტერნეტის გადასახადს დაუფინანსებენ. იხილეთ ფოტოები ​

2017-2018 წლებში თიბისი დაზღვევის, "კომფორტის" და "პოპსპორტის" მხარდაჭერით, თბილისის N32, N83, N124, N180, N94, N45, N99, N6 საჯარო სკოლებში, ჯამში 48 სოციალურად დაუცველ მოსწავლეს გადავეცით კომპიუტერი და ჩავურთეთ ინტერნეტი. ​იხილეთ ფოტოები ​

სოციალურად დაუცველი უფროსკლასელების ლეპტოპებითა და ინტერნეტით უზრუნველყოფა 2017 წელს, დევნილთა დასახლებებით დავიწყეთ! 2008 წლის ომის შემდეგ მშობლიური სახლის გარეშე დარჩენილ მოსწავლეებს კომპიუტერები ჩვენი მხარდამჭერი Elit Electronics-ის, TBC Insurance-ისა და Ernst & Young-ის დახმარებით გადავეცით. წეროვანში 24, წილკანსა და ფრეზეთში კი 6-6 ოჯახი ჩავრთეთ. იხილეთ ფოტოები ​