თიკოს ხატვის ნიჭი აქვს, მძივების აწყობა ეხერხება და თანაც გადაწყვიტა ფრჩხილების სპეციალისტი გახდეს! მუხრანი კი საზღვაო უნივერსიტეტში ჩაბარებას და მეზღვაურობას გეგმავს. “ლეპტობით ყველაფერს გავაკეთებ, რაც უნივერსიტეტში დამჭირდება” - გვიყვება მუხრანი.
მარის ტურიზმის ფაკულტეტზე უნდა სწავლა! უნდა საქართველოს ღირსშესანიშნავი ადგილები მოინახულოს და სხვებსაც გააცნოს. მისი ძმა, ლუკა კი მეზღვაურობაზე ოცნებობს. “ლეპტოპს გამოვიყენებ საგანმანათლებლო აქტივობებისათვის, ადვილად შევძლებ ჩავერთო დისტანციურ სწავლებაში და მოვემზადებოდი ეროვნული გამოცდებიასათვის”. - გვიყვება მარი. ლუკა კი ცოდნის გაღრმავების სურვილითა სავსე.
ბექა ძალიან მონდომებულია რომ მეზღვაური გახდეს! თავისუფალ დროს წიგნების კითხვაში ატარებს, მისი თქმით, ასე თან ერთობა და თან მეტ განათლებას იღებს. სკოლაში ისტორიის, გეოგრაფიის და ქართულის სწავლა მოსწონს, რადგან “სამშობლოსთან ასოცირდება და საინტერესოა” მისთვის. ახლა როცა ლეპტოპი აქვს გვიყვება: “უფრო მოტივაცია მომეცა ბრძოლისა და სწავლისა. უფრო თავდაჯერებულად ვივლი ჩემი მიზნებისკენ”
ლუკასა და ირმას საყვარელი საგანი სკოლაში ისტორიაა. ლუკა ისიც კი გადაწყვიტა, რომ სამომავლო პროფესია ამ საგანს დაუკავშიროს და ისტორიის მასწავლებელი გახდეს! ირმას კი ჯერ არ აურჩევია რა მიმართულებით გააგრძელებს სწავლას. ძმას ფეხბურთის თამაში და ფიზიკური აქტივობები მოსწონს, დას კი წიგნების კითხვა, რადგან სჯერა, რომ წიგნი ადამიანს საკუთარი თავის პოვნაში ეხმარება. ლუკაც და ირმაც გვპირდებიან, რომ ლეპტოპს განვითარებისა და განათლებისთვის გამოიყენებენ.
ელზას სამომავლო გეგმები ჯერ კიდევ უცნობია - არ იცის რა პროფესიით ან სად აპირებს სწავლის გაგრძელებას. თუმცა სკოლაში საქართველოსა და მსოფლიოს ისტორიის შესწავლა მის დიდ ინტერესსა და მოტივაციას იწვევს. რა გასაკვირია, რომ საყვარელ საგნადაც ისტორია დაგვისახელა. ელზა ხშირად კითხულობს წიგნებს დამატებითი ინფორმაციის მისაღებად. მიაჩნია, რომ დღესდღეობით საუკეთესო საშუალება განვითარებისთვის ინტერნეტი და კომპიუტერია. დარწმუნებულია, რომ მასაც აუცილებლად დაეხმარება ცოდნის გაღრმავებაში.
ანას გეოგრაფიის მასწავლებლობა გადაუწყვიტავს! სკოლაშიც ყველაზე მეტად გეოგრაფიის გაკვეთილები უყვარს, ასევე ქართული, ინგლისური, ისტორია და სამოქალაქო განათლება. ქიმიას და ფიზიკას კი ალღო ვერ აუღო. “მე მინდა რომ უფრო აქტიურად ჩავერთო სხვადასხვა პროექტში და მივაღწიო წარმატებას, ლეპტობის მიღებით კი ამის შესაძლებლობა მომეცემა” - გვიწერს ანა კითხვარში.
გოჩას შოთა რუსთაველის სახელობის უნივერსიტეტში უნდა ჩაბარება. მაღალ მთიან აჭარაში ცხოვრობს და ბათუმის უნივერსიტეტიც ყველაზე მეტად მოსახერხებელი სიახლოვის გამო, მიმართულება ჯერ არ აურჩევია. თავისუფალ დროს წიგნების კითხვაში ან ფეხბურთის თამაშში ატარებს, რადგან ფიქრობს, რომ ადამიანის ცხოვრებაში სწავლა და გართობა დაბალანსებული უნდა იყოს. “ვფიქრობ, ლეპტოპი დამეხმარება ჩემთვის საჭირო ინფორმაციის მარტივად მოპოვებაში” - გვიწერს გოჩა კითხვარში.
ინგას ფსიქოლოგობაც სურს და ქართულის მასწავლებლობაც, არჩევანი მასზეა. იულიას კი ვეტერინარობა აქვს გულში! ორივე დას ფრენბურთის თამაში უყვარს თავისუფალ დროს. შოთა რუსთაველის სახელობის ბათუმის უნივერსიტეტში აპირებენ სწავლას და ლეპტოპიც სწავლაში დიდ დახმარებას გაუწევს.
თამაზმა სკოლა დაამთავრა და მეზღვაურობა სურს! წელს ეროვნულ გამოცდების ჩაბარება ვერ შეძლო, თუმცა ახლა უფრო მეტად მოტივირებულია და მომავლი წლისთვის ემზადება. უკვე ინტერნეტი და კომპიუტერიც აქვს რომ უკეთესად მოემზადოს და სასურველს მიაღწიოს.
“იუთუბში, გუგლში, ტვიტერში, ფეისბუქში და სხვა. ხშირად შეიძლება მოვიპოვო საინტერესო ან ინფორმაციული მასალა, რაშიც ხელს შემიწყობს ჩემი ლეპტოპი.” - გვიყვება გიგა, რომელსაც მეზღვაურობა სურს. საზღვაო უნივერსიტეტში ჩასაბარებლადაც უკვე ემზადება. თავისუფალ დროს წიგნებს კითხულობს.
ანუკის ჯერ არ გადაუწყვიტავს, რა პროფესიას დაეუფლება სამომავლოდ. თუმცა ზუსტად იცის, რომ უნივერსიტეტში ჩაბარებას აპირებს. სკოლაში ბიოლოგიით დიდად არ ინტერესდება, მაგრამ ქართული, ისტორია, ინგლისური და სპორტი მისი საყვარელი საგნებია. Როგორც ანუკი გვიყვება, თავისუფალ დროს სიამოვნებას ხატვით ან წერით იღებს. ფიქრობს, რომ კომპიუტერი დაეხმარება ახალი და საინტერესო ინფორმაციის გაგებაში.
რაული ხასიათების ადამიანია - ხან რისი კეთება მოსწონს, ხან რისი, შესაბამისად თავისუფალ დროს სხვადასხვა ჰობი აქვს. სკოლაში ინგლისური არის მისი საყვარელი საგანი, რადგან მისი თქმით, ქიმიაზე და ფიზიკაზე ადვილი გასაგებია. რაულს ჯერ არ გადაუწყეტია რა გამოვიდეს ან საერთოდ უნდა თუ არა უნივერსიტეტში ჩაბარება. იმედია, ლეპტოპი მის თვალსაწიერს საგრძნობლად გააფართოვებს!