ჩაურთე ინტერნეტი სოციალურად დაუცველ უფროსკლასელებს

მარიამი

მარიამი ბავშვობიდან ხატავს. მეექვსე კლასიდან არქიტექტორობა დაისახა მიზნად. მაგისტრატურის გავლა კი აშშ-ში სურს. უკვე მე-11 კლასში “ჩართეს” ნაჩუქარ ლეპტოპსაც დაუმეგობრდა და დამოუკიდებლად დიზაინების შექმნაც დაიწყო. 2021 წელს „კოდის ერთი საათის“ კვირეულის ფარგლებში 3D პროექტები შექმნა და საქართველოს მასშტაბით კონკურსის ფინალშიც გავიდა! თავისუფალ დროს ნახატების გარდა, ესკიზებსაც ქმნის - ინტერნეტის საშუალებით მისი საოცნებო სახლის დიზაინი შექმნა. 

ელისო

ელისო აბიტურიენტია, თუმცა ახერხებს დრო გამონახოს, არაფორმალური განათლების პროექტებში ჩაერთოს და საკუთარი თავი ასეც განავითაროს. მისი თქმით, ძალიან უნდა წვლილი შეიტანოს თავისი ქალაქისა და ქვეყნის განვითარებაში. მხარში აქტიური მეგობრები უდგანან, მათთან ერთად სხვადასხვა გარემოსდაცვით და კულტურულ აქტივობებს გეგმავს! იტაცებს მხატვრული ლიტერატურის კითხვა და ხატვა, თუმცა თავს ხელოვნად არ მიიჩნევს. როგორც გვიამბო, ინტერნეტის საშუალებით საინტერესო ნახატებს ეცნობა და სხვადასხვა ეპოქებშიც დამოგზაურობს. იხილეთ სრულად

ლუკა

ლუკამ გადაწყვიტა, ერთ-ერთ ყველაზე უჩვეულო ფაკულტეტზე — სკანდინავიური ენების ფილოლოგიაზე — ისწავლოს, თბილისის სახელმწიფო უნივერსიტეტში. მის სურვილების სიაში პირველი ჩრდილოეთის ციალის ნახვა წერია. ლუკამ სხვა ოცნებებიც გაგვიმხილა - ყველაზე გრძელი გვირაბის გავლა ნორვეგიაში, ზამთრის ოლიმპიურ თამაშებზე დასწრება, შუაღამის მზის, ოსლოს, სტოქჰოლმის, ლონდონის და ინგლისის ქალაქ ბიბურის ხილვა. ახლა აბიტურიენტია და კომპიუტერი „ძვირფას დროს უზოგავს”. იხილეთ სრულად

ქეთი

ქეთის პროფესია დიდი ხანია გადაწყვეტილი აქვს - მოდის დიზაინერობა - თუმცა, როცა საქმე უნივერსიტეტის არჩევაზე მიდგა, ინფორმაციის მოსაძიებლად ინტერნეტს მიაკითხა. პარალელურად გამოცდებისთვის ტესტებს აკეთებს და კონსპექტებს წერს hubu.ge-დან. ყველაზე კარგად ხატვა გამოსდის. სამხატვრო სკოლაში უკვე 6 წელია დადის და წლის ბოლოს გამოფენაც ექნება! 2 ტილო უკვე მზად აქვს, ახლა კი 3 უზარმაზარ ნახატზე მუშაობს. გარდა ამისა, ქეთი სამხრეთ კორეული მუსიკის, ფილმებისა და სერიალების ფანია და კომპიუტერს ამისთვისაც იყენებს. იხილეთ სრულად

თორნიკე

თორნიკე ხარაგაულის სოფელ საქარქედში ცხოვრობს. მისი მთავარი გატაცება მეფუტკრეობაა და გადაწყვიტა სწავლა ამ მიმართულებით გააგრძელოს - პროფესიულ კოლეჯში ჩააბაროს და სოფლის მეურნეობის სხვა დარგებზეც შეიძინოს ცოდნა. როგორც თვითონ გვიყვება, კომპიუტერი ,,გარესამყაროსგან მოწყვეტილი თვალსაწიერის გაფართოებასა” და თვითგანვითარებაში დაეხმარა. თან ახალი მეგობრებიც შეიძინა სოციალური ქსელებით. დარწმუნებულია, რომ ინტერნეტი ჩვენს დროში ძალიან მნიშვნელოვანია საზოგადოებაში ადაპტაციისთვის.

მარიამი

მარიამი სოფელ რგანში ცხოვრობს. სკოლაში სულ 80 მოსწავლეა, მაგრამ ყველამ იცის, რომ თუ კომპიუტერი დასჭირდათ, მარიამი დაეხმარება. ეკოაქტივისტია - მისი პროექტით საქართველოს სამ ქალაქში მზის პანელები დამონტაჟდება! ჟურნალისტობაც გამოსდის - თავის გადაცემებს, რეპორტაჟებს აკეთებს. კიდევ, ოპერა უყვარს, სკოლის სპეკტაკლებში მონაწილეობს და სცენარებიც დაუწერია. ახლა, როცა უკვე კომპიუტერი აქვს, მისი ყოველდღიურობა შეიცვალა. სკოლაში გაკვეთილების მომზადებისას სულ ცდილობს კანვას პროგრამით ანიმაციები შექმნას და ბავშვებს გაუზიაროს. იხილეთ სრულად

ნიკა

17 წლის ნიკა ოქროსმედალოსანი აბიტურიენტია, მომზადებას დამოუკიდებლად აპირებს! პროფესიის არჩევისას მან ორი მთავარი მისწრაფება გააერთიანა - ხატვა და ტექნიკური საგნების სიყვარული. აპირებს ავტომობილების ინჟინერია და დიზაინი ისწავლოს. დამოუკიდებლად ძირითადად პორტრეტებს ხატავს ხოლმე, ხოლო ინტერნეტის საშუალებით მანქანების მოდელების სქემებს იძიებს.  ნიკა ინგლისურსაც აქტიურად სწავლობს - მისთვის საჭირო მასალები ქართულად უბრალოდ არც მოიპოვება. იხილეთ სრულად 

ქეთა

როცა ჩართეს ერთ-ერთი პარტნიორი, Digital bus-ი, ჩვენს ბენეფიციარებს უფასო ონლაინ კურსებს სთავაზობდა ინტერიერის დიზაინში, ქეთა მაშინვე ჩაეწერა. ქეთა კურსზე ყველაზე პატარაა, მაგრამ მონდომებისა და შემოქმედებითი ნიჭის წყალობით ყველა სირთულეს ლახავს და ლექტორის ქებასაც იმსახურებს. საკუთარი პროგრესით თავადაც კმაყოფილია - ფიქრობს რომ, იპოვა ის, რისი კეთებაც მართლა აინტერესებს და აპირებს, ინტერიერის დიზაინი პროფესიად აქციოს. უნივერსიტეტები უკვე მოიძია. იხილეთ სრულად

ლაშა

ლაშა ქობულეთში დაიბადა და გაიზარდა. ახლა კი საზღვაო აკადემიაში გამოცდების ჩაბარებისთვის ემზადება. მისი მომავლის გეგმების ინსპირაციას ინტერნეტს ნამდვილად ვერ დავაბრალებთ - ეს ოცნება ზღვის, მეზღვაური მეგობრების და ნათესავების შემხვედვარეს გაუჩნდა, თუმცა ინტერნეტი ოცნების ასრულებაში  ეხმარება. ინფორმაციის მოძიება, გამოცდებისთვის მომზადება, ონლაინ გაკვეთილებზე დასწრება - ყველა ის ნაბიჯი, რაც მეზღვაურობამდე აშორებს, კომპიუტერის საშუალებით აქვს შესასრულებელი. იხილეთ სრულად

ნიკა

ნიკა თვითნასწავლი, ამბიციური გიტარისტია. 2022 წელი მისთვის ახალი ეტაპია - თბილისში გადმოდის და სჯერა, რომ თავისი ბენდის შექმნის ოცნებას აიხდენს. მხარში მისი მეგობრები, მუსიკალური ჯგუფი “რეზო და ბავშვები”, ამოუდგებიან. ლაგოდეხის ნაყინის ფესტივალზე ასობით მაყურებლის წინაშე მათთან ერთად ნიკამაც დაუკრა! სხვათაშორის, მუსიკას თავადაც წერს. გვიყვება, რომ მთელი აბიტურიენტობის წელი ონლაინ მოუწია მასწავლებლებთან მომზადება და კომპიუტერის გარეშე სწავლა შეუძლებელი იქნებოდა. იხილეთ სრულად

ნინი

18 წლის ნინი ლაგოდეხში ცხოვრობს და ბავშვობიდან ექიმობაზე ოცნებობს, თუმცა მას შემდეგ, რაც კომპიუტერი აქვს, ფოტოშოპსა და ილუსტრატორს დაეუფლა, შეკვეთებიც მიიღო და ფულიც გამოიმუშავა. გარდა ამისა, ენების შესწავლით დაინტერესდა - თურქული B1 დონეზე და ცოტა ჩინურიც ისწავლა, უკვე 20 იეროგლიფი იცის! წელს აბიტურიენტია და სამედიცინო უნივერსიტეტში ჩაბარებისთვის ემზადება - ქირურგობა ან პედიატრობა სურს. ძალიან მიზანდასახულია, თანაც ინტერნეტით მასალების მოძიება უადვილდება. ლეპტოპი მის პატარა ძმასაც ეხმარება. 

მარიამი

სერიალით შთაგონებულმა მარიამმა ქირურგობა გადაწყვიტა. ოღონდ ეს შთაგონება დროებითი და ზედაპირული გატაცება სულაც არ არის - მიზანდასახულად ემზადება მომავალი პროფესიისთვის და ქიმიას და ბიოლოგიას გულდასმით სწავლობს. მას შემდეგ რაც ინტერნეტი ჩავურთეთ, საათობით ზის და ქირურგიული ოპერაციების ჩანაწერებს უყურებს! ინტერნეტის დახმარებით ნაკერების დადებაც ისწავლა - ზის და სხვადასხვა ხილზე ვარჯიშობს. ინტერნეტი ინგლისურის სწავლაშიც ეხმარება.

სევერიანი

სევერიანი ჩვენი ერთ-ერთი ყველაზე ინტერესიანი ბენეფიციარია, რომელიც ინტერნეტით განათლების მიღებას აუცილებლად მოგანდომებთ! ჩართვიდან რეკორდულ დროში „მურწყუს“ ათასობით მოსწავლეს შორის კვირის და თვის ლიდერი გახდა! ონლაინ მეცადინეობის შედეგად ბაქსვუდის საზაფხული ბანაკშიც მოხვდა და როგორც ერთ-ერთი გამორჩეული ბანაკელი, ინგლისში წასვლითაც კი დაჯილდოვდა! სევერიანმა საფრანგეთშიც იმოგზაურა „ჩართეს“ დონორების ორგანიზებულ თეატრალურ ფესტივალზე. უკვე აკაკი წერეთლის სახელმწიფო უნივერსიტეტში, საინჟინრო-ტექნიკურ ფაკულტეტზე სწავლობს. მარსმავლის პროექტზე მუშაობს! . იხილეთ სრულად

მარიკა

მარიკა მომავალი პოლიციელია - სკოლის დამთავრების შემდეგ სწავლის გაგრძელებას პოლიციის აკადემიაში აპირებს და როცა დრო მოვა, კრიმინალური გამომძიებელიც უნდა გახდეს. მას შემდეგ, რაც ინტერნეტი ჩაერთო, ყველაფრისთვის მზადებას მეთოდურად მიუყვება - უკვე შეისწავლა, პოლიციელობიდან გამომძიებლობამდე მისასვლელად რა ნაბიჯების გადადგმა სჭირდება და პოლიციის აკადემიის შემდეგ უმაღლესი განათლების მიღებასაც აპირებს. მარიკა, ასევე, ანტერპრენორია - ყვავილებს ყიდულობს,  თაიგულებს ამზადებს და ყიდის, რასაც ინტერნეტის ქონა კიდევ უფრო უადვილებს. იხილეთ სრულად

თამარი

თამარი აპირებს, უსამართლობის წინააღმდეგ იბრძოლოს. „თუ ვხედავ, რომ ვინმეს ამცირებენ, ვერ ვითმენ, რომ არ ჩავერიო”. თამარს იურიდიულზე უნდა ჩაბარება, რომ გამომძიებელი ან აგენტი გახდეს. ადრე ჯარისკაცობაზე ვფიქრობდი, მაგრამ მგონია, რომ ასე უფრო მეტი კარგი საქმის გაკეთებას მოვახერხებო. ინტერნეტი ახალგაზრდულ პროექტებში ჩართვაში და დროის უკეთ განაწილებაში ეხმარება. უყვარს ფსიქოლოგიურ-დეტექტიური ჟანრის ფილმები და ფიქრობს, რომ ჩვენ მიერ გაცემული ემოციები ყოველთვის გვიბრუნება უკან - შეიძლება, გვიან, მაგრამ ყოველთვის. იხილეთ ვიდეო

ხატია

ხატია თეთრიწყაროში ცხოვრობს, მანგლისის რაიონში. დარდობდა, რომ მანგლისის შესახებ ბევრ ადამიანს ინფორმაცია არ აქვს, და ამიტომ Facebook-ზე გახსნა გვერდი დაბა მანგლისი, რომლის საშუალებითაც უკვე 2000-მდე ადამიანმა გაიგო უფრო მეტი მანგლისზე, ხატიასა და მისი მეგობრების წყალობით კი 50-მდე ადამიანი კი კოტეჯის მეპატრონეებს დაუკავშირდა და მანგლისში დასასვენებლად წავიდა. ხატიას სამართლის სწავლა და კრიმინალთან ბრძოლა აქვს გადაწყვეტილი. სანამ უნივერსიტეტში ჩააბარებს, ინტერნეტით ინგლისურს სწავლობს და ინფორმაციას ონლაინ ეცნობა. იხილეთ სრულად

თორნიკე

თორნიკე უკვე საავიაციო უნივერსიტეტის პირველი კურსის სტუდენტია. ხან სასკოლო რადიოში მუშაობდა, ხან ტელევიზიებში მოხალისეობდა, თან პროექტს უძღვებოდა, რომელიც ჟურნალისტიკით დაინტერესებულ ბავშვებს განათლების მიღებაში ეხმარება! უნივერსიტეტში სწავლის პარალელურად სურს ესპანური და 3D დიზაინი შეისწავლოს. ამ მრავალმხრივ საქმიანობას აქამდე სკოლის კომპიუტერის დახმარებით მისდევდა, ხანდახან მეგობრების სახლებიდანაც მუშაობდა. ახლა მას უკვე საკუთარი კომპიუტერი აქვს და წარმოგიდგენიათ, რა ამბებს დაატრიალებს?! იხილეთ სრულად

ბაგრატი

ბაგრატი აბიტურიენტია და ბიზნესსა და ეკონომიკაზე სწავლას აპირებს, რომ აუდიტორი ან ბუღალტერი გამოვიდეს. ახალი კომპიუტერითა და ინტერნეტით გამოცდებისთვის ემზადება და ინგლისურს სწავლობს. ბაგრატი ინტროვერტია - თავისუფალ დროს სახლში დარჩენა, კითხვა და ფილმების ყურება ურჩევნია. ბუნებაში სეირნობა და არქიტექტურაზე დაკვირვებაც სიამოვნებს. კიდევ ერთი ძალიან საინტერესო ჰობი აქვს - ქაღალდისგან ნაირ-ნაირ ნაკეთობებს ქმნის - Youtube-ზე ვიდეობს უყურებს და სწავლობს. უკვე ისე გაიწაფა, რომ თვითონაც შეაქვს კორექტივები ფიგურების დიზაინში. იხილეთ სრულად

ტასო

ტასო წელს სკოლას ამთავრებს და შეუძლია, ბავშვობის ოცნებები სერიოზულ კარიერულ გეგმად აქციოს და პროფესიული სტილისტი გახდეს. უკვე გადაწყვიტა, რომელ კოლეჯში შეიტანს საბუთებს, მანამდე კი დროს არ კარგავს - youtube-ის ვიდეობით ეუფლება სხვადასხვა ტექნიკას, მერე კი ოჯახის წევრებზე ატარებს ექსპერიმენტებს. მოკლედ, საოცრად მონდომებულია და მისი ხელმარჯვეობითაც ყველა ძალიან კმაყოფილია! იხილეთ სრულად

(დაქორწინდა და ფბს მიხედვით მიზნები გვერდზე აქვს გადადებული)

მარეხი

მარეხი 2020 წელს ჩავრთეთ -  სწორედ მაშინ, ყველაფერი რომ გაჩერდა, გარე სამყაროს რომ მოვწყდით და პროდუქტიულობის, სამყაროსთან წვდომის ერთადერთ საშუალებად ინტერნეტი რომ დაგვრჩა. ამ დროს მარეხი აბიტურიენტი იყო და ინტერნეტი რომ არა, ვერც გაკვეთილებს დაესწრებოდა, ვერც გამოცდებისთვის მოემზადებოდა და მისი აზრით, ვერც სტუდენტი გახდებოდა. მარეხმაც ბეჯითად გამოიყენა ყველა ონლაინ რესურსი, ტესტი და გაკვეთილი და დღეს ახალი ცხოვრებით ცხოვრობს  - უკვე სტუდენტია. მარეხი მომავალი არქიტექტორია. იხილეთ სრულად.

ნინი

ნინი 18 წლის მწერლობითა და ფოტოგრაფიით გატაცებული მოსწავლეა, თელავის სოფელ ართანადან. წერის ნიჭი პანდემიის დროს აღმოაჩინა. თავდაპირველად ძალიან მორცხვობდა, თავის ნაწერებს მალავდა და არავის აკითხებდა, თუმცა როდესაც ინტერნეტში პლატფორმა „4love.ge“ აღმოაჩინა და თანატოლების მოთხრობები ნახა, თავდაჯერებულობა მოემატა და მასაც მოუნდა თავისი ამბის გამოქვეყნება. ასეც მოიქცა - თავისივე დაწერილი ისტორია „ორ სამყაროს შორის“ მართლაც გაუზიარა ფართო აუდიტორიას!