რატომ?

დღეს საქართველოში 78,000-მდე სოციალურად დაუცველ მოსწავლეს არ აქვს ინტერნეტი. მათი 95% ცხოვრობს ინტერნეტის დაფარვის ზონაში, თუმცა ხელმოკლეობის გამო ვერ ახერხებს ინტერნეტის საფასურის გადახდას. 

ის გეოგრაფიული სივრცე და გარემო, რომელშიც ასეთი მოზარდები იზრდებიან და ყალიბდებიან, მათ არ აძლევს ფინანსური, აკადემიური თუ პროფესიული განვითარების შანსს, მისწრაფებების, ამბიციებისა და მიზნების ჩამოყალიბების საშუალებას. ასეთი მოზარდი რჩება დღევანდელი ინტერნეტ რევოლუციის მიღმა და არ აქვს საშუალება, წვლილი შეიტანოს ქვეყნისა და სამყაროს განვითარებაში. 

ინტერნეტი ადამიანის ფუნდამენტური უფლებაა.

ინტერნეტის მიწოდებით მოსწავლეს უჩნდება არა მხოლოდ სწავლისა და განვითარების ულევი შესაძლებლობა, არამედ ეცვლება წარმოდგენა სამყაროს შესახებ, ეზრდება შესაძლებლობათა ველი, უჩნდება თვითგანვითარების სტიმული, ამბიციები და მიზნები. 

ინტერნეტის წყალობით მოსწავლეს აქვს მსოფლიო ცოდნის უმთავრესი (და ხშირად ერთადერთი) წყარო, კომუნიკაციის, თვითგანვითარებისა და თვითგამოხატვის უმნიშვნელოვანესი საშუალება. ინტერნეტით ის სწავლობს უცხო ენებს, ემზადება გამოცდებისთვის, უყურებს ფილმებს, ეზიარება ხელოვნებას, თვალს ადევნებს მსოფლიო სიახლეებს, იგებს ბუნებრივი კატასტროფების შესახებ, ყიდულობს და ყიდის, ეძებს სამსახურს, უსმენს მუსიკას, იჩენს მეგობრებსა და პარტნიორებს, მუშაობს და სწავლობს დისტანციურად. 

„ჩართეს“ თვისობრივი და რაოდენობრივი კვლევების წინასწარი შედეგების მიხედვით, ჩვენი მოსწავლეები პროექტში მონაწილეობიდან 1 წელში საშუალოდ აუმჯობესებენ აკადემიურ მოსწრებას, კომპიუტერულ უნარ-ჩვევებსა და წიგნიერებას, ინტერნეტის განათლებისთვის მოხმარების სიხშირეს, ზოგად და მენტალურ კეთილდღეობასა და სხვა. იხილეთ წინასწარი შედეგების სრული ანგარიში და ტრენინგების გავლენის ანგარიში

საერთაშორისო კვლევების მიხედვით, ინტერნეტის გამოყენებასთან ერთად იზრდება მოსწავლის აკადემიური მოსწრება, ვითარდება კომპიუტერული უნარ-ჩვევები, იზრდება სოციალური კაპიტალი, დასაქმებისა და შემოსავლიანობის შანსები. ინტერნეტის გავრცელებასთან ერთად ვითარდება ქვეყნის ეკონომიკური მდგომარეობა, მოსახლეობის პროდუქტიულობა, საზოგადოებრივი წესრიგი, თანასწორობა და მთლიანობა.

მეტი ინფორმაციისთვის იხილეთ: ხშირად დასმული კითხვები და 2021 წლის ანგარიში.

 

 

გავლენა

თვისობრივი და რაოდენობრივი კვლევის მეთოდების დახმარებით ჩვენ მუდმივად ვზომავთ ჩვენი პროექტის გავლენას მოსწავლეების ცხოვრებაზე. დროში განმეორებადი კვლევის წინასწარი შედეგების მიხედვით ჩართვიდან 1 წელში მოსწავლეთა მეხუთედზე მეტი აუმჯობესებს სასკოლო ნიშნებს; 85% აუმჯობესებს კომპიუტერულ უნარ-ჩვევებს; 35% თავს უფრო ბედნიერად გრძნობს; 39% აუმჯობესებს ქულას თვითშეფასების სკალაზე; 40% უფრო ხშირად იყენებს ინტერნეტს ინფორმაციის მოსაძიებლად და ა.შ.

ჩვენი გუნდი მოსწავლეებს უტარებს, ასევე, ტრენინგებს მედიაწიგნიერებაში, ფინანსურ და ონლაინ განათლებაში. კვლევის მიხედვით, ტრენინგზე დასწრებიდან 2 თვეში მოსწავლეთა 88% აფასებს ინფორმაციის ნამდვილობას ონლაინ; 80% იყენებს ნახსენებ ონლაინ სასწავლო რესურსებს და 72% ადგენს საკუთარ ბიუჯეტს.

ჩართულია2049მოსწავლე

დაფინანსებულია1575680ლარით

ჩვენ ვართ4675მხარდამჭერი

წარმატების ისტორიები

ჩართულია

მარიამი

ხატვის ნიჭით დაჯილდოებულ, მებრძოლ გოგოზე უნდა მოგიყვეთ ქალაქ ჯვარიდან!

იცნობთ მოზარდებს, მშობლიური ქალაქის უკეთესობისკენ შეცვლაზე რომ გულანთებულები ფიქრობენ? 16 წლის მარიამი ზუსტად ასეთია. გადაწყვეტილი აქვს, იბრძოლოს, რომ ჯვრის მომავალ თაობას იმ დაბრკოლებების გადალახვა აღარ მოუწიოს, რაც მას შეხვდა. სჯერა, რომ ინტერნეტით და კომპიუტერით უკვე მთელ მსოფლიოსთან აქვს წვდომა.

მარიამი ბავშვობიდან ხატავს. მეექვსე კლასიდან არქიტექტორობა დაისახა მიზნად. უკვე მე-11 კლასში “ჩართეს” ნაჩუქარ ლეპტოპსაც დაუმეგობრდა და დამოუკიდებლად დიზაინების შექმნაც დაიწყო. 

2021 წელს „კოდის ერთი საათის“ კვირეულის ფარგლებში 3D პროექტები შექმნა და საქართველოს მასშტაბით კონკურსის ფინალშიც გავიდა! თავისუფალ დროს ნახატების გარდა, ესკიზებსაც ქმნის - ინტერნეტის საშუალებით მისი საოცნებო სახლის დიზაინი შექმნა და დააპროექტა კიდეც. გვიყვება, რომ ინფორმაციის მოძიება და სკოლის დავალებების შესრულება უკვე სრულყოფილად შეუძლია, კომუნიკაციის უნარებიც განივითარა.

როგორც გვითხრა, გადაწყვეტილი აქვს მაგისტრატურაზე არქიტექტურა აშშ-ში შეისწავლოს, შემდეგ კი საქართველოში დაბრუნდეს და სფერო განავითაროს. ოცნებობს, რომ თავი საქართველოსაც და მსოფლიოსაც დაამახსოვროს!

 

ჩართულია

ელისო

17 წლის სუპერ ცნობისმოყვარე ელისოზე გიამბობთ, ჭიათურის სოფელ წირქვალიდან!

ელისო აბიტურიენტია, თუმცა მისი ყოველდღიურობა მხოლოდ მასწავლებლებთან სიარულით და თემების წერით სულაც არ შემოიფარგლება. ახერხებს დრო გამონახოს, არაფორმალური განათლების პროექტებში ჩაერთოს და საკუთარი თავი ასე განავითაროს. მისი თქმით, ძალიან უნდა წვლილი შეიტანოს თავისი ქალაქისა და ქვეყნის განვითარებაში. მხარში აქტიური მეგობრები უდგანან, მათთან ერთად სხვადასხვა გარემოსდაცვით და კულტურულ აქტივობებს გეგმავს!

ელისო დარწმუნებით ამბობს, რომ პასუხგაუცემელ კითხვებზე ინფორმაციის მოძიების სტიმული სწორედ კომპიუტერმა მისცა. იტაცებს მხატვრული ლიტერატურის კითხვა და ხატვა, თუმცა თავს ხელოვნად არ მიიჩნევს. როგორც გვიამბო, ინტერნეტის საშუალებით საინტერესო ნახატებს ეცნობა და სხვადასხვა ეპოქებშიც დამოგზაურობს.

აბიტურიენტისთვის ყველაზე აქტუალურ საკითხზე - პროფესიაზე - როდესაც ვკითხეთ ასე გვიპასუხა:  “მრავალი მიმდინარეობა მაინტერესებს, თუმცა გამორჩეულად მიზიდავს პოლიტიკის მეცნიერებები და სოციოლოგია. იმედია ზუსტად ისე ჩავაბარებ გამოცდებს, როგორც მინდა.” 

ელისოს წინ შრომატევადი წელი და გამოცდები ელის, თუმცა გვჯერა, რომ შრომისმოყვარეობითა და დროის სწორედ განაწილებით მიზანს აუცილებლად მიაღწევს.

ჩართულია

ლუკა

ლუკა მდინარე ენგურის პირას, ქალაქ ჯვარში ცხოვრობს, მისი გული კი სკანდინავიის მთებს ეკუთვნის. ინტერნეტმა მომავალი პროფესია აღმოაჩენინა და ოცნებების მრავალფეროვანი სიაც შეავსებინა!

ლუკამ გადაწყვიტა, ერთ-ერთ ყველაზე უჩვეულო ფაკულტეტზე — სკანდინავიური ენების ფილოლოგიაზე — ჩააბაროს, თბილისის სახელმწიფო უნივერსიტეტში. რითი გაიტაცა სამეგრელოს პატარა ქალაქში მცხოვრები ბიჭი შორეულმა სამყარომ? ზამთარი ლუკას საყვარელი წელიწადის დროა; გრძელი, ცივი ზამთრით განთქმულმა ჩრდილოეთმა, შემდეგ კი მამაცმა ვიკინგებმა და ნორვეგიულმა ფილმებმა მისი გონება საბოლოოდ მოიცვა. 

რა გასაკვირია, რომ ლუკას სურვილების სიაში პირველი ჩრდილოეთის ციალის ნახვა წერია. სხვა ოცნებებიც გაგვიმხილა - ყველაზე გრძელი გვირაბის (Gotthard Base Tunnel) გავლა ნორვეგიაში, ზამთრის ოლიმპიურ თამაშებზე დასწრება, შუაღამის მზის, ოსლოს, სტოქჰოლმის, ლონდონის და ინგლისის ქალაქ ბიბურის ხილვა. 

ახლა აბიტურიენტია და კომპიუტერი „ძვირფას დროს უზოგავს”. ყველა საჭირო ინფორმაცია ერთ სივრცეში — ინტერნეტშია თავმოყრილი. გვიყვება, რომ ლეპტოპის გარეშე ვერც ონლაინ გაკვეთილებს დაესწრებოდა და ვერც  წიგნების ელექტრონული ვერსიებით მოემზადებოდა ეროვნული გამოცდებისთვის. თავისუფალ დროს კომიქსების კითხვას და ანიმეებს ყურებას უთმობს.

გვჯერა, რომ ლუკა აუცილებლად აისრულებს ოცნებებს და ჩრდილოეთის ციალსაც ნახავს!

ჩართულია

ბარბარე

ბარბარე თსუ-ს სტუდენტი და ჩვენი ორგანიზაციის რეგიონული წარმდგენია! და მისი წყალობით სოფელ შუაფხოში ცხოვრება ბევრად უფრო საინტერესო და მრავალფეროვანია! 

ბარბარე უკანა ფშავის პაწაწინა სოფელში გაიზარდა. აქაურობა სრულიად ხელუხლებელია - ვერც ტურისტს ნახავთ, ვერც ხმაურს გაიგონებთ - არაგვის გუგუნს თუ არ ჩავთვლით. 

შუაფხოს სკოლაში სულ 17 მოსწავლე დადის. თავად ბარბარეს, არც მეტი, არც ნაკლები, 9 და-ძმა ჰყავს. სახლიდან სკოლამდე მისასვლელად ყოველ დღე დაახლოებით 2 კილომეტრის გავლა სჭირდებათ (ხშირად თოვლსა და ავდარში!). დედა სკოლის დირექტორია, მამა - შუაფხოს ავტობუსის მძღოლი. ერთი სიტყვით, ვინც კი უკანა ფშავში მოხვედრილა, ბარბარეს ოჯახს, ალბათ, ყველა იცნობს. 

ბარბარე ოცნებებისა და იდეების ქონით არ კმაყოფილდება - როგორც მოგვიყვა, ცდილობს, იდეები რეალობად აქციოს და თავისი აქტივობებით თემზე და  საზოგადოებაზე პოზიტიური გავლენა ჰქონდეს. ყველაფერი GLOW-ს ბანაკით დაიწყო, რომელიც გოგონების გაძლიერებას და მათში ლიდერული თვისებების გაღვივებას ემსახურება და ბარბარეს ორგანიზებული სემინარებით და ლექციებით გაგრძელდა, რომლებიც მოსწავლეებს სხვადასხვა თემებზე სასაუბროდ იწვევდა. სემინარები მოსწავლებიისთვის იყო განკუთვნილი, თუმცა მასწავლებლები და თემის სხვა მაცხოვრებლებიც დიდი სიამოვნებით ესწრებოდნენ.

პროექტებისთვის ბარბარე ინტერნეტის დახმარებით ემზადებოდა. სანამ ჩართეს კომპიუტერი ექნებოდა, სკოლაში უწევდა სიარული და სკოლის კომპიუტერის გამოყენება, რომლის ტექნიკური გაუმართაობის გამო სტრესულ სიტუაციებშიც ჩავარდნილა, თუმცა ახლა ვეღარაფერი დააბრკოლებს!

ბარბარე უკვე ტურიზმის ფაკულტეტის სტუდენტია და ჩვენს ორგანიზაციას რეგიონებში ონლაინ განათლების გავრცელებაში ეხმარება - ის მაღალმთიანი სოფლების სკოლებში ჩადის და მოსწავლეებისთვის ონლაინ პლატფორმებზე პრეზენტაციებს ატარებს. აპირებს, სამომავლოდ ფშავში საბანაკო სივრცეც გახსნას და უკანა ფშავში ტურიზმის განვითარებას შეუწყოს ხელი.  ნახეთ ვიდეო

ჩართულია

გვანცა

გვანცა  სტუდენტი გახდა -  თავისი მრავალი ინტერესიდან ერთ-ერთი შეუძლია პროფესიად აქციოს და ინგლისური ენის ფილოლოგი გახდეს! წინ მრავალი თავგადასავალი ელოდება, რომელიც აღტაცებით ავსებს.

არადა, რამდენიმე თვის წინ რომ ეკითხა ვინმეს - ეროვნულ გამოცდებზე გასვლას საერთოდ არ აპირებდა. მასწავლებლებთან სიარულს და გამოცდებისთვის მომზადებას ვერ ახერხებდა, მაგრამ მერე ჩვენს პროექტში „ჩაერთო“ - ინტერნეტით ტესტები მოიძია და გადაწყვიტა, ბედი ეცადა - თურმე ძალიანაც წარმატებულად. 

სტუდენტობა გვანცასთვის თბილისში მარტო საცხოვრებლად გადმოსვლას, ახალი ცხოვრების დაწყებას ნიშნავს. ყველა ასეთი დიდი ცვლილება შიშთანაა დაკავშირებული, თუმცა შევთანხმდით, რომ ინტერნეტის დახმარებით ყველა სირთულის გადალახვაა შესაძლებელი - საჭმლის რეცეპტების მოძიება იქნება თუ შექსპირის სონეტების. 

გვანცას მრავალი ინტერესი აქვს - ხატავს და გრაფიკული დიზაინი იტაცებს, ცეკვა და ფილმების ყურება უყვარს. ინგლისურთან ერთად გერმანული ენის სწავლას ფიქრობს და სასწავლებლად საზღვარგარეთ წასვლის ოცნებებიც ეპარება, რაც მის ამჟამინდელ გამოცდილებაზე დაყრდნობით სულაც არ ჟღერს შეუძლებელ გეგმად - გვანცამ უკვე იცის, რამხელა მაგიური ძალა აქვს ინტერნეტს, როცა რაღაცის სწავლა გინდა. იხილეთ სრულად  

ჩართულია

ქეთა

ყველაფერი იქიდან დაიწყო, რომ ქეთა ჩართეს კომპიუტერთან ერთად გადაცემულ საგანმანათლებლო პროგრამების სიას ცნობისმოყვარეობით ჩაუჯდა - რამე კონკრეტულ საგანში დახმარება არ სჭირდებოდა, უბრალოდ შთაგონების წყაროს ეძებდა. მაშინ ჩართეს ერთ-ერთი პარტნიორი, @Digital bus-ი, ჩვენს ბენეფიციარებს უფასო ონლაინ კურსებს სთავაზობდა ინტერიერის დიზაინში და ქეთაც მაშინვე ჩაეწერა. 

ქეთა კურსზე ყველაზე პატარაა, მაგრამ მონდომებისა და შემოქმედებითი ნიჭის წყალობით ყველა სირთულეს ლახავს და ლექტორის ქებასაც იმსახურებს. საკუთარი პროგრესით თავადაც კმაყოფილია - ფიქრობს რომ, იპოვა ის, რისი კეთებაც მართლა აინტერესებს და აპირებს, ინტერიერის დიზაინი პროფესიად აქციოს. როგორც მოგვიყვა, ადრე კერვის კურსებზეც დადიოდა, რასაც დღემდე აქტიურად იყენებს საკუთარი სამოსის დიზაინის შესაცვლელად და გასახალისებლად, ახლა კი მის შემოქმედებით ნიჭს ახალი გასაქანი მიეცა.

ქეთამ უკვე მოიძია ყველა ის უნივერსიტეტი და კურსი, სადაც შეძლებს, ინტერიერის დიზაინი უკეთ შეისწავლოს - გაარკვია, რა საგნები ბარდება და როგორ უნდა მოემზადოს. აღფრთოვანებას მეგობრებსაც უზიარებს და ერთ-ერთი მათგანი აპირებს კიდეც, მას ამ პროფესიულ თავგადასავალში შემოურთდეს - ერთად ეცნობიან სხვადასხვა მიმდინარეობებს, ოცნებობენ და წარმოიდგენენ, როგორი იქნება, გქონდეს ისეთი პროფესია, რომელიც მოგწონს და შეძლო დამოუკიდებლად ცხოვრება. ამ მიზნის მისაღწევად კი მხოლოდ მონდომება და ინტერნეტის უსაზღვრო შესაძლებლობების გამოყენება სჭირდებათ. იხილეთ სრულად

ჩართულია

ლაშა

ბავშვობაში თქვენც ოცნებობდით მეზღვაურობაზე? წარმოიდგენდით როგორ მიაპობს თქვენი გემი ხან ბობოქარ ტალღებს, ხანაც კი მშვიდ ოკეანეში მილივლივებს? გიფიქრიათ როგორია ცხოვრება, როცა შენი ყოველდღიურობა ხან საზღვაოსნო ფუსფუსს, ხანაც კი ახალ-ახალი ქალაქების, პორტების, კულტურების, ხალხის გაცნობას მოიცავს? გაიცანით ლაშა - ბიჭი, რომელსაც არამხოლოდ უოცნებია მეზღვაურის ცხოვრებაზე, არამედ დეტალურად აქვს ნაფიქრი, როგორ აქციოს ბევრის ბავშვობის ფანტაზია რეალობად.

ლაშა ქობულეთში დაიბადა და გაიზარდა. ახლა კი სკოლის დამთავრებისთვის და საზღვაო აკადემიაში გამოცდების ჩაბარებისთვის ემზადება. მისი მომავლის გეგმების ინსპირაციას ინტერნეტს ნამდვილად ვერ დავაბრალებთ - ეს ოცნება ზღვის, მეზღვაური მეგობრების და ნათესავების შემხვედვარეს გაუჩნდა, თუმცა ინტერნეტი ოცნების ასრულებაში  ეხმარება. ინფორმაციის მოძიება, გამოცდებისთვის მომზადება, ონლაინ გაკვეთილებზე დასწრება - ყველა ის ნაბიჯი, რაც მეზღვაურობამდე აშორებს, კომპიუტერის საშუალებით აქვს შესასრულებელი. ლაშაც მონდომებით ეკიდება ამ მისიას - აკადემიის გზაზე მიმავალს, ინტერნეტი ნავიგაციაში ეხმარება, კომპასის მაგივრობას კი ფანჯრიდან დანახული ზღვა და მეზღვაურობის ოცნება უწევს.

ჩართულია

მარიამი

დღეს ჭიათურელ მარიამზე მოგიყვებით, რომლის პროექტითაც საქართველოს სამ ქალაქში მზის პანელები დამონტაჟდება!

მარიამი სოფელ რგანში ცხოვრობს. სკოლაში მხოლოდ 80 მოსწავლეა, მაგრამ ყველამ იცის, რომ თუ კომპიუტერი სჭირდებათ მასთან უნდა მივიდნენ - დაეხმარება და დაყვედრების გარეშე ათხოვებს. მარიამს არ სურს სხვას ის გამოაცდევინოს, რაც თვითონ გაიარა. მიზნადაც განათლების სისტემის შეცვლა აქვს დასახული, უნდა თავისი წვლილი შეიტანოს და ეს მხოლოდ ოცნებად არ დარჩეს.

გარემოსდაცვითი ორგანიზაცია CENN-ის კონკურსში თავის სკოლელებთან და მასწავლებელთან ერთად იმონაწილევა. მათი იდეა დაფინანსდა - ჭიათურაში, ზესტაფონსა და ტყიბულში მზის პანელები დამონტაჟდება. ეკოაქტივისტობის გარდა, მარიამს ჟურნალისტობაც გამოსდის. დაიჯერებთ? თავისი გადაცემებს, რეპორტაჟებს აკეთებს და მულტფილმებსაც ახმოვანებს!

სკოლის სპეკტაკლებში მონაწილეობს და სცენარებიც დაუწერია. ზოგჯერ, კი თავს ოპერის მომღერლად ხედავს - ჩართავს ქართულ არიებს, აჰყვება და თავს სცენაზე წარმოიდგენს.

ახლა, როცა უკვე კომპიუტერი აქვს, მისი ყოველდღიურობა შეიცვალა. სკოლაში გაკვეთილების მომზადებისას სულ ცდილობს კანვას პროგრამით ანიმაციები შექმნას და ბავშვებს გაუზიაროს. მისი თქმით, ახსნა იმდენად კარგად გამოსდის, რომ ბიოლოგიის მასწავლებელმა გაკვეთილიც კი ჩაატარებინა. წელს აბიტურიენტია და გამოცდებისთვის საგულდაგულოდ მოემზადება

ჩართულია

ნიკა

გაიცანით ნიკა - თვითნასწავლი მუსიკოსი და ნამდვილი გიტარისი ლაგოდეხიდან!

18 წლის ნიკასთვის მუსიკალური ინსტრუმენტები ცხოვრების განუყოფელი ნაწილია. ბოლო 3 წლის განმავლობაში ფულს მხოლოდ ერთი მიზნისთვის - ელექტრო გიტარის საყიდლად - აგროვებდა და გამოუვიდა კიდეც. 2022 წელი ნიკასთვის ახალი ეტაპია - თბილისში გადმოდის და სჯერა, რომ თავისი ბენდის შექმნის ოცნებას ფრთებსაც შეასხამს. მხარში კი მისი მეგობრები, მუსიკალური ჯგუფი “რეზო და ბავშვები”, ამოუდგებიან. ლაგოდეხის ნაყინის ფესტივალზე ასობით მაყურებლის წინაშე მათთან ერთად ნიკამაც დაუკრა! სხვათაშორის, მუსიკას თავადაც წერს. 

ინტერნეტი ნიკასთვის მუდმივი სიახლეების წყაროა და მის მთავარ ინტერესებში ცოდნას სწორედ აქედან იღრმავებს. აღმოაჩინა ახალი თანამოაზრეები - მუსიკასთან ახლოს მყოფი ადამიანები. გვიყვება, რომ მთელი აბიტურიენტობის წელი ონლაინ მოუწია მასწავლებლებთან მომზადება და კომპიუტერის გარეშე სწავლა შეუძლებელი იქნებოდა.

ბავშვობიდან მსახიობობაც სურს. მიუხედავად იმისა, რომ ლაგოდეხში ამ მიმართულებით ვერ განვითარდა, ჰოლივუდში წასვლა გულში ოცნებად მაინც აქვს! თან, იმას ამბობს, რომ სცენაზე მუსიკოსის გარდა, მსახიობიც ვარო. 

შეიძლება ნიკას მუსიკალური განათლებით დაინტერესდით, თუმცა რამდენად დაუჯერებლადაც არ უნდა ჟღერდეს ნიკას არც მასწავლებელი ჰყოლია და არც აკორდების და ნოტების ცნობა იცის მუსიკალური სიმბოლოებით. ალბათ, საქმე ნიჭთან და აბსოლუტურ სმენასთან გვაქვს. 🤔 მოკლედ, ნიკას როკვარსვკლავობას ერთად დაველოდოთ!

ჩართულია

ნინი

18 წლის ნინი ლაგოდეხში ცხოვრობს და ბავშვობიდან ექიმობაზე ოცნებობს, თუმცა მას შემდეგ, რაც კომპიუტერი აქვს, ფოტოშოპსა და ილუსტრატორს დაეუფლა, შეკვეთებიც მიიღო და ფულიც გამოიმუშავა. 

ნინის თვლის, რომ ინტერნეტის დახმარებით საკუთარი თავის უკეთესი ვერსია გახდა - მისი ინტერესები მხოლოდ მედიცინით აღარ შემოიფარგლება. ფრილანსინგზე, სამსახურის ეფექტურ მოძიებაზე, ინტერიერის დიზაინსა და ვებდიზაინზე საგას ტრენინგები გაიარა. lingwing.com-ზე თურქული B1 დონეზე შეისწავლა და ჩინურზეც ვარჯიშობს - უკვე 20 იეროგლიფი იცის. 

წელს აბიტურიენტია და სამედიცინო უნივერსიტეტში ჩაბარებისთვის ემზადება - ქირურგობა ან პედიატრობა სურს. ძალიან მიზანდასახულია, თანაც ინტერნეტით მასალების მოძიება უადვილდება. ლეპტოპი მის პატარა ძმასაც ეხმარება. გვჯერა, რომ ნინი ინტერნეტსა და კომპიუტერს კიდევ ბევრჯერ გამოიყენებს სასარგებლოდ! 

ჩართულია

მარიამი

თავისუფალ დროს, გასართობად და დროის გასაყვანად სერიალებს ალბათ ყველა უყურებს, მაგრამ მარიამი ცოტა განსაკუთრებული შემთხვევაა - სერიალით შთაგონებულმა ქირურგობა გადაწყვიტა. ოღონდ ეს შთაგონება დროებითი და ზედაპირული გატაცება სულაც არ არის - მიზანდასახულად ემზადება მომავალი პროფესიისთვის და ქიმიას და ბიოლოგიას გულდასმით სწავლობს. 

მას შემდეგ რაც ინტერნეტი ჩავურთეთ, საათობით ზის და ქირურგიული ოპერაციების ჩანაწერებს უყურებს! ასე უკეთ წარმოვიდგენ საკუთარ თავს ექიმის ამპლუაში და სწავლის მოტივაციაც მემატებაო. ინტერნეტის დახმარებით ნაკერების დადებაც ისწავლა - ზის და სხვადასხვა ხილზე ვარჯიშობს. ინტერნეტი ინგლისურის სწავლაშიც ეხმარება - ფილმებსაც ინგლისურად უყურებს!

მარიამის მიზანი საზღვარგარეთ სწავლაა, ოღონდ აუცილებლად საქართველოში დაბრუნებით, რომ მერე აქაც ამაყად დაიწყოს ხოლმე დღე სიტყვებით: „მშვენიერი დღეა სიცოცხლის გადასარჩენად".

ჩართულია

სევერიანი

სევერიანი ჩვენი ერთ-ერთი ყველაზე მონდომებული და ინტერესიანი ბენეფიციარია, რომელიც ინტერნეტით განათლების მიღებას აუცილებლად მოგანდომებთ! 

სევერიანი ჩართვიდან რეკორდულ დროში „მურწყუს“ ათასობით მოსწავლეს შორის კვირის და თვის ლიდერი რომ გახდა!  

ახალი რაღაცების სწავლა ყოველთვის უყვარდა, მაგრამ მას შემდეგ, რაც ინტერნეტი აქვს, დავალებასთან ერთად დამატებით ინფორმაციასაც იძიებს და გაკვეთილებს უფრო მრავალფეროვანს ხდის. ყველაზე მეტად ტექნიკური საგნები, გეოგრაფია და ისტორია აინტერესებს.

სწორედ ამ საგნების ოლიმპიადებმა მოახვედრა ბაქსვუდის საზაფხული ბანაკში, სადაც ინგლისურის გაუმჯობესებასთან ერთად უამრავი მეგობარი შეიძინა და როგორც ერთ-ერთი გამორჩეული ბანაკელი, ინგლისში წასვლითაც კი დაჯილდოვდა!

ვინმეს წლის დასაწყისში რომ ეთქვა, იმოგზაურებ და შენი საყვარელი ფეხბურთის გუნდის სტადიონზეც მოხვდებიო, არაფრით დაუჯერებდა, მაგრამ ეს ყველაფერი სულაც არ არის! წელს სევერიანმა საფრანგეთშიც იმოგზაურა „ჩართეს“ დონორების ორგანიზებულ თეატრალურ ფესტივალზე და სრულად მოინუსხა მოგზაურობის სიყვარულით. 

წელს სევერიანი აბიტურიენტია. წარმატებული სტუდენტი რომ გახდება, ამაში ეჭვი არავის გვეპარება, მაგრამ ძალიან გვაინტერესებდა, ამდენი ინტერესისა და გატაცების მქონე მოსწავლე რა მიმართულებას აირჩევდა. თურმე, ამ ყველაფერთან ერთად, ბავშვობიდან უყვარს ხატვა და საკმაოდ კარგადაც გამოსდის, მიუხედავად იმისა, რომ ხატვის წრეზე თავისი სოფლიდან ჩოხატაურში რეგულარულად ვერ ახერხებს სიარულს.

ჰოდა, სევერიანმა ხატვის, ტექნიკური საგნებისა და გეოგრაფიის იდეალური სინთეზი იპოვა - არქიტექტურა! ამბობს, რომ ერთი სული აქვს, ამ სფეროს საფუძვლიანად შესწავლას როდის დაიწყებს.

ჩვენ კი ერთი სული გვაქვს, მის დაპროექტებულ ქალაქებს როდის ვიხილავთ!

 
ჩართულია

მარიკა

მარიკა მომავალი პოლიციელია - სკოლის დამთავრების შემდეგ სწავლის გაგრძელებას პოლიციის აკადემიაში აპირებს. ინტერნეტის დახმარებით მოიძია, აკადემიაში ჩასაბარებლად რა გამოცდების ჩაბარება სჭირდება და ტესტებისთვისაც ონლაინ ემზადება. გეგმებიც ამბიციური აქვს - როცა დრო მოვა, კრიმინალური გამომძიებელიც უნდა გახდეს. 

მას შემდეგ, რაც ინტერნეტი ჩაერთო, ყველაფრისთვის მზადებას მეთოდურად მიუყვება - უკვე შეისწავლა, პოლიციელობიდან გამომძიებლობამდე მისასვლელად რა ნაბიჯების გადადგმა სჭირდება და პოლიციის აკადემიის შემდეგ უმაღლესი განათლების მიღებასაც აპირებს. 

მარიკა, ასევე, ანტერპრენორია - ყვავილებს ყიდულობს,  თაიგულებს ამზადებს და ყიდის, რასაც ინტერნეტის ქონა კიდევ უფრო უადვილებს. გარდა იმისა, რომ ამით ფინანსურად უფრო დამოუკიდებელი ხდება და პრაქტიკულ უნარ-ჩვევებს ივითარებს, ეს მისთვის, ასევე, შემოქმედებითი საქმიანობაცაა. შემოქმედებითობა კი მარიკაში უხვადაა - როცა გვეგონა, რომ მის მრავალფეროვან ინტერესებზე უკვე ყველაფერი ვიცოდით, გვითხრა, რომ კიდევ ერთი ოცნება აქვს - მსახიობობა, რადგან სცენაზე დგომა ყველაზე დიდ სიამოვნებას ანიჭებს. 

მოკლედ,  როგორც დაგპირდით, მარიკასთან მომავლის გეგმებზე საუბრისას ნამდვილად არ მოიწყენთ. და ვინ იცის, კიდევ რამდენ რამეს აღმოაჩენს საკუთარ თავზე და რამდენ ახალ გატაცებას შეიძენს ახლა, როცა მთელი სამყაროს ინფორმაციასთან - ინტერნეტთან - აქვს წვდომა. იხილეთ სრულად

ჩართულია

გიორგი

19 წლის გიორგიმ არც მეტი, არც ნაკლები, ოთხი მცირე ბიზნესი წამოიწყო:

1. ეკოლოგიურად სუფთა პლასტელინი და ტყლარწები (რომელსაც თბილისი მოლში ყიდდა და რომლისთვისაც Junior Achievement Georgia-ს მეორე ადგილიც დაიმსახურა);

2. სამკურნალო-მცენარეული, ეკოლოგიურად სუფთა საპნები და სურნელოვანი სანთლები (რომლებსაც ინტერნეტით ყიდდა; სანთლებისთვის მაღალმოლეკულურ პარაფინებს იყენებდა, რაც მდგრად სტრუქტურას უზრუნველყოფდა და შედეგად საკმაოდ მაღალი ხარისხის პროდუქციას იღებდა);

3. „ტერაარტი“, რომელიც მის შემოქმედებით და ანტრეპრენიორულ მისწრაფებებს აერთიანებს: გიორგის თავისივე ნახატები ჩანთებზე, ქურთუკებსა და შარვლებზე, მაისურებზე, ქუდებსა და ფეხსაცმელზე გადააქვ (როგორც ამბობს, მისთვის ხარისხი ძალიან მნიშვნელოვანია, ამიტომ საღებავებს საფრანგეთიდან იწერს);

4. „სტიკერ38” - 40 დიზაინის სტიკერი საუნივერსიტეტო თემატიკაზე. 

„ძირითადად მარტო ვმუშაობ, რაც ძალიან დიდ ცოდნას მაძლევს წარმოების მთელ ციკლზე: მასალების ყიდვა, დამზადება, შეფუთვა, ბრენდირება, ხარჯთაღრიცხვა, მარკეტინგი, გაყიდვები, სოციალური მედიის ფეიჯების მართვა. მაგრამ ამ ყველაფერს ძალიან დიდი დრო მიაქვს - სკოლაში სანამ ვსწავლობდი, უფრო ვახერხებდი დროის პოვნას, მაგრამ რაც სტუდენტი გავხდი, უფრო მეტად მიჭირს ბალანსის პოვნა. აგრარულ უნივერსიტეტში ვსწავლობ ქიმიის ფაკულტეტზე, თუმცა მიმართულების შეცვლას და ბიზნესის ფაკულტეტზე გადასვლას ვფიქრობ, უფრო უკეთ რომ შევძლო ჩემი საქმის კეთება.

გიორგი ჩვენს პროექტში 2018 წლიდან მონაწილეობს. „ინტერნეტის ქონამ ჩემი ბიზნესების მართვა ძალიან გაამარტივა - ბაზრის კვლევა, ონლაინ გაყიდვები, მარკეტინგი, მასალების გამოწერა ბევრად უფრო სწრაფი და ხელმისაწვდომია. მეორე მხრივ, უნივერსიტეტისთვის მეცადინეობა კომპიუტერის გარეშე წარმოუდგენელია. რაც მთავარია, მუდმივი წვდომა მაქვს ინფორმაციაზე, ფილმებზე, მედიაზე, რაც პიროვნულ განვითარებაში მეხმარება და კიდევ უფრო მეტ იდეას მიჩენს, რა შეიძლება გავაკეთო.”

ჩართულია

თამარი

თამარი ჩვენი ყველაზე აქტიური ბენეფიციარია, რომელსაც უყვარს ადამიანებთან ურთიერთობა და  უსამართლობის წინააღმდეგ ბრძოლას აპირებს.

არა, კი არ აპირებს, უკვე იბრძვის კიდეც. „რამდენიმე მასწავლებელმა გადაწყვიტა, რომ უზრდელი ვარ იმის გამო, რომ ხმამაღლა ვაფიქსირებ, როცა უსამართლობას ვხედავ. არ აქვს მნიშვნელობა, დიდია თუ პატარა, თუ ვხედავ, რომ ვიღაც სხვას ამცირებს, ან ცუდად ექცევა, ვერ ვითმენ, რომ არ ჩავერიო”. იმასაც დასძენს, რომ მსგავს სიტუაციებში გამოხატვის ფორმასაც აქვს მნიშვნელობა - „ძალიან იმპულსური ვარ, მაგრამ ვცდილობ, მოთმინებით ავუხსნა, რატომ მგონია მათი ქცევა არასწორი.”

უსამართლობასა და დანაშაულთან ბრძოლას მომავალში პროფესიულად აპირებს  - 16 წლის თამარს იურიდიულზე უნდა ჩაბარება, რომ მერე გამომძიებელი ან აგენტი გახდეს. ადრე კადეტთა სკოლაში ჩაბარებაზე და ჯარისკაცობაზე ვფიქრობდი, მაგრამ მგონია, რომ ასე უფრო მეტი კარგი საქმის გაკეთებას მოვახერხებო, თუმცა იმასაც განიხილავს, რომ ერთიც გააკეთოს და - მეორეც. 

ახლა მოდელირებულ სასამართლო პროცესებში და სხვადასხვა ახალგაზრდულ პროექტშია ჩართული, რაც მომავალ იურიდიულ კარიერაშიც დაეხმარება. „ჩართეს“ გადაცემული კომპიუტერი და ინტერნეტი მეცადინეობის გარდა განსაკუთრებით სწორედ ამაში ადგება - ადრე ტელეფონში უწევდა ფაილების გადმოწერა და მუშაობა, მიმდინარე საორგანიზაციო საკითხებშიც ნაკლებად ახერხებდა ჩართვას და ინფორმირებულიც ნაკლებად იყო. ახლა მეტად მობილიზებულია და დროსაც უკეთ ანაწილებს.

ინტერნეტს თავისუფალ დროსაც იყენებს - ფილმების ყურება უყვარს, განსაკუთრებით ფსიქოლოგიური და დეტექტიური ჟანრის ფილმები მოსწონს. ჰგონია, რომ საკუთარი გამოცდილების გარდა ფილმებიც გვეხმარება ადამიანებთან ურთიერთობაში და მათი ქცევების უკეთ გაგებაში.

თამარი ფიქრობს, რომ როცა აქტიური ხარ, თავად ხდი შენს ცხოვრებას საინტერესოს. რაც უფრო მეტად გამოხატავ საკუთარ თავს, მით უფრო მეტმა ადამიანმა იცის შენი შესაძლებლობების შესახებ და გარშემოც უფრო მეტი ისეთი ადამიანი გყავს, რომელსაც შეგიძლია, დაეყრდნო. თამარს უყვარს ადამიანებთან ურთიერთობა. ის ფიქრობს, რომ ერთმანეთისადმი გამოხატული კეთილგანწყობა და ყურადღება, ჩვენ მიერ გაცემული დადებითი ემოციები ყოველთვის გვიბრუნდება უკან - შეიძლება, ცოტა გვიან, მაგრამ ყოველთვის. იხილეთ ვიდეო

ჩართულია

ხატია

ალბათ, გსმენიათ მოძრაობაზე Spend Your Summer in Georgia, რომლის ფარგლებშიც რიგითი ადამიანები საქართველოს ტურიზმის პოპულარიზაციას ეწევიან. ჰოდა, აღმოჩნდა, რომ ჩვენი 17 წლის ბენეფიციარი ხატია უკვე დიდი ხანია „ამ საქმეშია“!

ხატია თეთრიწყაროში ცხოვრობს, მანგლისის რაიონში. ძალიან დარდობდა, რომ მანგლისის შესახებ ბევრ ადამიანს ინფორმაცია არ აქვს, და ამიტომ Facebook-ზე გახსნა გვერდი “დაბა მანგლისი”, რომლის საშუალებითაც უკვე 5000-მდე ადამიანმა გაიგო უფრო მეტი მანგლისზე, 50-მდე ადამიანი კი ხატიასა და მისი მეგობრების დახმარებით კოტეჯებისა და სახლების მეპატრონეებს დაუკავშირდა და მანგლისში დასასვენებლად წავიდა. მოკლედ, თავადაც ვერ მიხვდნენ, ისე გადაიქცნენ სოციალურ საწარმოდ.

ხატიას ყველაზე მეტად ის აწუხებს, რომ ახალგაზრდებს, ზაფხულის გარდა, სოციალური ცხოვრება ფაქტიურად არ აქვთ, ვერც სოციალური აქტივობებისთვისა და შეკრებისთვის საჭირო ადგილს პოულობენ. ჰოდა, გადაწყვიტეს, ამ პრობლემასაც თავად შესჭიდებოდნენ და არასამთავრობო ორგანიზაცია გაეხსნათ, თუმცა სამართლებრივი რეგულაციების გამო ეს ამბავი სრულწლოვანებამდე გადადეს :) იხილეთ სრულად

ჩართულია

იაკობი

ეს იაკობია, ჩვენი ერთ-ერთი პირველი ბენეფიციარი, რომელიც „ჩართვის“ შემდეგ არც მეტი, არც ნაკლები, გრაფიკული დიზაინერი გახდა! ამ პროფესიას დამოუკიდებლად რომ ეუფლებოდა, მალე იმდენად რთულ პროექტებზე დაიწყო მუშაობა, რომ მოგვიწია, მისთვის უფრო ძლიერი კომპიუტერიც კი გადაგვეცა.

ეს ყველაფერი არაა - იაკობმა ინტერნეტის წყალობით კიდევ ერთი გატაცება აღმოაჩინა: ავტომობილები. ახლა აპირებს, მექანიკოსიც გამოვიდეს. უყვარს ხატვა, ახალი ცოდნისა და უნარების შეძენა. ფიქრობს, რომ ადამიანისთვის თვითდამკვიდრება და თვითრეალიზაცია ძალიან მნიშვნელოვანია და ინტერნეტი ამის სრულ საშუალებას იძლევა. იხილეთ სრულად

ჩართულია

ნათია

ეს ნათიაა, 18 წლის, ზუგდიდიდან.

წელს სტუდენტი გახდა - ინგლისურ ენასა და ლიტერატურას სწავლობს. უცხო ენების მიმართ ინტერესი ყოველთვის ჰქონდა -  სკოლაში ინგლისურს, გერმანულსა და რუსულს სწავლობდა. მას შემდეგ, რაც მასწავლებელმა უთხრა, რომ გერმანულის კარგ დონეზე ცოდნა გერმანიაში სწავლის გაგრძელების საშუალებას მისცემდა, მოტივაცია მოემატა და მეათე კლასში გოეთეს უნივერსიტეტის გამოცდა A1 დონეზე ჩააბარა. ახლა აპირებს,, უნივერსიტეტში მეორე ენად გერმანული აირჩიოს და გერმანიაში სწავლის იდეა რეალობად აქციოს. 

მას შემდეგ, რაც ჩართეს კომპიუტერი და ინტერენტი აქვს, მეცადინეობისთვის ბევრად მეტ რესურსთან აქვს წვდომა - უყურებს ინგლისურენოვან ფილმებს, ტელეშოუებს და ბევრად უკეთ ესმის და ლაპარაკობს. „ცნობისმოყვარეობამ მძლია და ესპანურისა და ფრანგულის ონლაინგაკვეთილებიც ვიპოვე და სწავლა დავიწყე."

„ინტერნეტის ქონა ჩემი მრავალი ინტერესისა და ცნობისმოყვარეობის დაკმაყოფილებაშიც მეხმარება - ვკითხულობ, ფილმებს ვუყურებ და ასე ვცდილობ სხვების პერსპექტივის წარმოდგენას და გამოცდილების გაღრმავებას. კიდევ ერთი ჰობი მაქვს - ფოტოგრაფია - და ინტერნეტის საშუალებით შემიძლია, მეტი გავიგო ამ სფეროზე."

ზუსტად არ იცის, სად წარმოუდგენია საკუთარი თავი რამდენიმე წლის შემდეგ, მაგრამ ძალიან უნდა, რომ იმოგზაუროს და ბევრი სხვადასხვა ქვეყანა და კულტურა ჰქონდეს ნანახი. მთავარ ოცნებად კი მაინც გერმანიაში სწავლა რჩება, რაც დიდ  მოტივაციას აძლევს, რომ უფრო მეტი ენერგია ჩადოს სწავლაში.

ჩართულია

თორნიკე

ყველაფერი 2016 წელს დაიწყო, როცა სკოლაში სამ საინტერესო პროექტში ჩართვა შესთავაზეს. თორნიკე სამივეში გაწევრიანდა - სმარტ კლუბშიც, ჟურნალისტიკის წრეშიც და ევროკავშირის შესახებ პროექტშიც. სწორედ აქ მიხვდა, რომ ჟურნალისტიკა ძალიან იზიდავს და ასე დაიწყო: სასკოლო რადიო, გაზეთი, ინტერვიუები ცნობილ ადამიანებთან, ჟურნალისტებთან, ტელევიზიების “შიდა სამზარეულოში” შეხედვა, გადაცემის ჩაწერები, ტელევიზიაში საზაფხულო მოხალისეობა... 

ამ საქმიანობას აქამდე სკოლის კომპიუტერის დახმარებით მისდევდა, ხანდახან მეგობრების სახლებიდანაც მუშაობდა. ახლა მას უკვე საკუთარი კომპიუტერი აქვს და წარმოგიდგენიათ, რა ამბებს დაატრიალებს?!

ახლა საქართველოს საავიაციო უნივერსიტეტში სწავლობს, პარალელურად ესპანურისა და 3D დიზაინის შესწავლა სურს. საყვარელ საფრანგეთში კი კომპიუტერის მეშვეობით "დამოგზაურობს".

სკოლის პერიოდში თორნიკე პროექტს გაუძღვა, რომელმაც ჟურნალისტიკით დაინტერესებული ბავშვები გააერთიანა და საშუალება მისცა,  როგორც თეორიული, ისე პრაქტიკული განათლება მიეღოთ და სხვადასხვა სფეროს წარმომადგენლებთან გადაცემები ჩაეწერათ. თორნიკე განათლების ხელმისწავდომობის ქომაგია და ფიქრობს, რომ მსგავსი პროექტები ფინანსურ მოგებას არ უნდა ემსახებურებოდეს. მისი აზრით, უსამართლობაა, რომ  მათ, ვისაც განათლების მიღება სურთ, ფინანური დაბრკოლებების გამო ეს უფლება ეზუღდებათ.

თორნიკეს მომავალშიც დიდი გეგმები აქვს - საზღვარგარეთ უნდა სწავლის გაგრძელება, ჟურნალისტიკის გარდა მარკეტინგითაცაა დაინტერესებული, მუდმივად სიახლეების, ახალი პროექტებისა და ლექციების ძებნითაა დაკავებული და ეს ყველაფერი უკვე სახლიდან გაუსვლელად შეუძლია. იხილეთ სრულად

 
ჩართულია

მარიკა

მარიკა ყოველდღიურად ჩადის პატარ-პატარა გმირობებს: უცხო ქალაქში, ოჯახისგან შორს, ხან სტუდენტურ ლაბირინთებში ერკვევა, ხან ბიუროკრატიულ საკითხებს აგვარებს, ხან ფილოსოფიური პრობლემებზე ფიქრობს და ხანაც ახალი კერძების რეცეპტებს ეძებს. 

მარიკა წელს სტუდენტი გახდა! ბუნებით ინტროვერტს, სიჩუმისა და სიმშვიდის მოყვარულს, თბილისის აუზაურში უწევს გზის გაკვალვა, თუმცა ძალიან მოსწონს დამოუკიდებლობა და ახალ გამოწვევებთან ბრძოლა. აღმოვაჩინეთ, რომ საერთო მანტრა გვაქვს - „რაღაც თუ არ ვიცი, დავგუგლავ!“. 

მას შემდეგ, რაც „ჩართეს“ ინტერნეტი და კომპიუტერი აქვს, მისი ცხოვრება ბევრად უფრო მარტივი გახდა - ვერც კი წარმოუდგენია, როგორ მოახერხებდა ოჯახსა და მეგობრებთან კომუნიკაციის გარეშე ყოფნას, სწავლაზე რომ აღარაფერი ვთქვათ. მთელი საუნივერსიტეტო გარემო ელექტრონულ სწავლებაზეა დაფუძნებული - იგულისხმება, რომ ყველა სტუდენტს უნდა ჰქონდეს ინტერენტი და პერსონალური კომპიუტერი, წინააღმდეგ შემთხვევაში უნივერსიტეტის ბიბლიოთეკაში უნდა იმეცადინო, რომელიც 7 საათამდე მუშაობს, რაც, გეცოდინებათ, საერთოდ არ არის საკმარისი დრო მეცადინობის დასასრულებლად, განსაკუთრებით თუ ნახევარ განაკვეთზეც მუშაობ. 

მარიკას ჰობი ფილმები და ლიტერატურაა, ყველაზე დიდი გატაცება კი - შერლოკ ჰოლმსი! ოცნობებს ინგლისში მოხვედრაზე და ყველა იმ ისტორიულ-გამოგონილი ადგილის ნახვაზე, რომელიც მის საყვარელ გმირთანაა დაკავშირებული. ვინ იცის, იქნებ ოდესმე თვითონაც მის პროფესიულ გზას დაადგეს -  კარგი გამომძიებელი აუცილებლად კარგი ფსიქოლოგი უნდა იყოს! მარიკა მომავალი ფსიქოლოგია - ძალიან აინტერესებს ეს ჩახლართული და საინტერესო დარგი. ინტერნეტით მასალებს იძიებს და კითხულობს, ინგლისურსაც აქტიურად სწავლობს, რადგან ბევრი მასალა ქართულად არ მოიპოვება. იხილეთ სრულად

ჩართულია

თორნიკე

როგორ მოვემზადოთ ეროვნული გამოცდებისთვის ონლაინ? ამას ჩვენი ბენფიციარი, თორნიკე, გასწავლით! 

თორნიკე ჩვენი ერთ-ერთი პირველი ბენეფიციარია წეროვნის დევნილთა დასახლებიდან. დღეს ის უკვე სტუდენტია - საქართველოს უნივერსიტეტში სწავლობს, სამართლის ფაკულტეტზე. ძალიან მოსწონს სტუდენტური ცხოვრება, ახალი მეგობრები, საგნები თან რთული რომაა, მაგრამ გამომწვევად  რთული და საინტერესო. ჯერ არ გადაუწყვეტია, სამართლის კონკრეტულად რა დარგს აირჩევს, მაგრამ წინ ბევრი დრო აქვს.

სამართლის ფაკულტეტზე რომ მოხვდა, ეს მხოლოდ მისი მონდომების დამსახურებაა - მისი და ინტერნეტის. ერთიანი ეროვნული გამოცდებისთვის ძირითადად თავისით მოემზადა - რესურსებს ონლაინ ეძებდა, გამოცდის სტრუქტურას სწავლობდა, ტესტებს აკეთებდა, სხვადასხვა ფორუმებს ეცნობოდა. მოკლედ, თვითდისციპლინა, მონდომება, ცოტა ინტერნეტის მაგიური ძალა და ყველაფერია შესაძლებელი. 

ინტერნეტი დღესაც ძალიან ადგება - ხან იურისპრუდენციის ლაბირინთების გამორკვევაში, ხანაც პირადი ინტერესების განსავითარებლად. როგორც მოგვიყვა, სპორტის ძალიან ბევრი სახეობა მოსწონს და ახლა უკვე შეუძლია, შეხვედრებს უყუროს, ათლეტებზე, სპორტულ შეჯიბრებებზე მეტი წაიკითხოს და ზოგადად უკეთ ადევნოს თვალი, რა ხდება სამყაროში, მეტად ინფორმირებული და გათვითცნობიერებული იყოს, რაც თავისთავად  თვითგამორკვევაში და საკუთარი ინტერესების განვითარებაში დაეხმარება. იხილეთ სრულად

ჩართულია

გიორგი

გიორგი მომავალი შეფ-მზარეულია! სკოლის დამთავრებისას, სამომავლო გეგმების განსაზღვრაში ინტერნეტი ძალიან გამოადგა - კოლეჯის შესახებ ინფორმაცია, საჭირო საბუთები, აპლიკაცია მოამზადა და უკვე კულინარიულ კოლეჯში სწავლობს! როგორც მოგვიყვა, სკოლის საგნებიდან განსაკუთრებით არცერთი არ იზიდავდა, მაგრამ ინტერნეტის საშუალებით მოახერხა, საკუთარი გატაცება მომავალ პროფესიად გადაექცია. 

სანამ პროფესიონალი მზარეული  გახდება, სახლში ექსპერიმენტებს ატარებს და ოჯახის წევრებს გემრიელობებს უმზადებს. რეცეპტებს, კულინარიულ რჩევებსა და სტატიებს ჯანსაღ კვებაზე ინტერნეტით იძიებს და სწავლობს. მოკლედ - მთელი ოჯახი კმაყოფილია!

ინტენეტი მეგობრებთან კომუნიკაციასაც უადვილებს და რაც მთავარია, თავის კიდევ ერთ გატაცებას, ფეხბურთს, უფრო მეტ დროს უთმობს - თამაშებს უყურებს, სიახლეებს ეცნობა. მოკლედ, ინტერნეტის წყალობით პროფესიულადაც ვითარდება და სოციალურადაც. 

„ჩართეს“ წყალობით გიორგის რომანტიკული ამბავიც გადახდა - ერთმანეთი „ჩართეს“ ორგანიზებულ ტრენინგზე გაიცნეს, ძალიან მოეწონათ და რაღაც ხანი ურთიერთობაც კი ჰქონდათ. იმედი გვაქვს, „ჩართესა“ და ინტერნეტსი წყალობით ჩვენი სხვა ბენეფიციარებიც შეძლებენ გულის სწორის პოვნას!  იხილეთ სრულად

ჩართულია

ბაგრატი

ბაგრატი ჩვენი ერთ-ერთი ყველაზე საინტერესო და გონიერი ბენეფიციარია, რომელსაც ქაღალდის ნაკეთობების შექმნა უყვარს.

ბაგრატი წელს აბიტურიენტია და სწავლას ბიზნესისა და ეკონომიკის ფაკულტეტზე აპირებს - აუდიტორობა ან ბუღალტრობა მინდაო. „ჩართეს“ გადაცემულ კომპიუტერსა და ინტერნეტს მეცადინეობისასაც აქტიურად იყენებს - სხვადასხვა ტესტებსა და სავარჯიშოებს აკეთებს, გამოცდებისთვის ემზადება. ინგლისურის უკეთ სწავლაც მინდაო და, ბევრი რომ ვექოთქოთეთ, დაგვპირდა, მომავალში ფილმებს ინგლისურად ვუყურებო. თურმე, მართვის მოწმობაც ინტერნეტის წყალობით აიღო - თეორია ჩემით, ინტერნეტით ვისწავლეო. 

ძლივს ავალაპარაკეთ. ბევრი ვიმსჯელეთ თუ ცოტა, შევთანხმდით, რომ ინტროვერტია -  თავისუფალი დრო რომ გამოუჩნდება, კლასელებთან ერთად ყოფნის მაგივრად ყოველთვის თავისთვის, სახლში ყოფნა და წიგნების კითხვა ან ფილმების ყურება ურჩევნია. ბუნებაში ყოფნაც მოსწონს -  ლაშქრობები და ექსკურსიები, ახალი ადგილების ნახვა, არქიტექტურაზე დაკვირვება. ჯერ საქართველოში ბევრი არ უმოგზაურია, თუმცა ძალიან უნდა და აპირებს.

კიდევ ერთი ძალიან საინტერესო ჰობი აქვს - ქაღალდისგან ნაირ-ნაირ ნაკეთობებს ქმნის - Youtube-ზე ვიდეობს ვუყურებ და ვსწავლობო. თავიდან ინტერესი ფეისბუქზე ნანახი ფოტოთი გაუჩნდა, მერე ვიდეოები მოიძია და ახლა თვითონაც შეაქვს კორექტივები ფიგურების დიზაინში. იხილეთ სრულად

ჩართულია

მზია

მზიამ სკოლა ოზურგეთში, დაბა ნასაკირალში, დაამთავრა. იქაურ მეგობრებსა და ოჯახზე მზე და მთვარე ამოსდის, მაგრამ სოფლის გარემო ერთფეროვანი ეჩვენება.

თუ ჰკითხავთ, რა გაინტერესებსო, ალბათ, მთელი დღე მოუნდება საკუთარი გატაცებების ჩამორიკრიკებას. არქეოლოგიაც აინტერესებს, პოლიტიკაც, გეოგრაფიაც, სპორტიც, სოფლის მეურნეობაც… თავისუფალ დროს წიგნებს კითხულობს, განსაკუთრებით ნოდარ დუმბაძე მიყვარსო. კინემატოგრაფიაც იტაცებს, თუმცა აქამდე ფილმებს მხოლოდ ტელევიზორში თუ ნახავდა - ინტერნეტით ფილმების სანახავად მეგაბაიტები ტელეფონით უნდა შეეძინა.

მზიას დიიდი გეგმებიც აქვს. ბათუმის შოთა რუსთაველის სახელმწიფო უნივერსიტეტში საბუნებისმეტყველო მეცნიერებათა და ჯანდაცვის ფაკულტეტზე, ეკოლოგიის მიმართულებით ჩააბარა. ძალიან უნდა, რომ „ცხოვრებაში რამეს მიაღწიოს” და ადამიანებს დაეხმაროს. რეგიონებში სოფლის მეურნეობის გაუმჯობესება სურს, ქალაქებში - ხეების დარგვა. ჟურნალისტობაზეც ფიქრობდა, რომ „ხალხს მიაწოდოს ინფორმაცია იმაზე, თუ როგორ უჭირთ სხვებს.” იხილეთ სრულად

ჩართულია

მაია

„მე ვარ მაია, 17 წლის. ამჟამად მეთერთმეტეკლასელი ვარ, ნახევრად აბიტურიენტი. მყავს 13 წლის ძმა, რომლის მეცადინეობის ტვირთიც მე ვიკისრე. ვცდილობ, სამაგალითო ადამიანი და მოსწავლე ვიყო და, რა თქმა უნდა, მშობლებისთვის საამაყო. მიყვარს ადამიანები, ახალი მეგობრები, საკმაოდ მალე შევდივარ ადამიანთან კონტაქტში. მიყვარს ცხოველები, მყავს ძაღლი, რომელსაც ზოი დავარქვი.

მიყვარს წიგნების კითხვა. თითოეული წიგნი მამოგზაურებს ახალ განზომილებაში, საიდანაც უსაზღვრო ემოციებით ვბრუნდები. საკმაოდ ემოციური ვარ, ამიტომაც არაა გასაკვირი, რომ ხშირად მიტირია წიგნის დასასრულზე საათობითაც კი. საერთოდ, წიგნებმა ითამაშა უდიდესი როლი ჩემს ფორმირებაში. ამჟამად ვკითხულობ ჰარპერ ლის წიგნს „ნუ მოკლლავ ჯაფარას“. ვთვლი, რომ ყველაზე ჰუმანური და კარგი წიგნია. 🎞 ძირითადად, ფილმები არ მიყვარს, თუმცა ამ ბოლო დროს ინტერნეტისა და კომპიუტერის საშუალებით წაკითხულ წიგნებზე გადაღებულ ფილმებს ვუყურებ, რაც ძალიან დიდი ემოციებით მავსებს და, ჩემი აზრით, საკმაოდ საინტერესოცაა, როგორ დაემთხვევა შენს გონებაში წარმოდგენილი სიუჟეტი ფილმის ეკრანიზაციას.

ინტერნეტი ჩემი ცხოვრების განუყოფელი ნაწილი იყო და იქნება. უამრავი ინფორმაციის მიღება შეგიძლია სულ რამოდენიმე წამში. ინტერნეტი ძალიან ბევრ რამეში დამეხმარა, მაგალითად უცხო სიტყვათა განმარტებების მოძიებაში, რომლებიც აქამდე არ ვიცოდი და საკმაოდ დისკომფორტს მიქმნიდა. ზოგადად, როცა რაღაც არ ვიცი, ძალიან მრცხვენია და დისკომფორტს ვგრძნობ, ამიტომაც ვცდილობ, ყველაფერი მოვიძიო ინტერნეტის საშუალებით, წავიკითხო და დავიმახსოვრო. ინტერნეტის საშუალებით გავარკვიე, ასევე, ამა თუ იმ უნივერსიტეტსა და პროფესიაზე გარკვეული ინფორმაცია, რაც საკმაოდ გამომადგა.

სამომავლოდ ვაპირებ სწავლის გაგრძელებას, რადგან ვთვლი, რომ აუცილებელია, უფრო მეტი ცოდნა მივიღო, ავიწყო კარიერა და არა მარტო ჩემს თავს, არამედ ჩემ გარშემო მყოფთაც ვარგო რამე. ზუსტად არ მაქვს გადაწყვეტილი, რა მინდა, თუმცა ვფიქრობ, ჩემი ადგილი სასამართლო დარბაზშია.“ იხილეთ სრულად

ჩართულია

ტასო

დღეს ანასტასიას (ტასოს) გაგაცნობთ - გამორჩეულად ხალისიან, ენერგიულ და მიზანდასახულ გოგოს!

ტასომ ბავშვობიდან იცოდა, რომ ხელში მაკრატელი უნდა სჭეროდა - თავიდან სამოსის დიზაინრობა უნდოდა, შემდეგ კი - სტილისტობაც. წელს სკოლას ამთავრებს და შეუძლია, ბავშვობის ოცნებები სერიოზულ კარიერულ გეგმად აქციოს და პროფესიული სტილისტი გახდეს (ვინ იცის, იქნებ - დიზიანერიც). 

უკვე გადაწყვიტა, რომელ კოლეჯში შეიტანს საბუთებს, მანამდე კი დროს არ კარგავს - youtube-ის ვიდეობით ეუფლება სხვადასხვა ტექნიკას, მერე კი ოჯახის წევრებზე ატარებს ექსპერიმენტებს. მოკლედ, საოცრად მონდომებულია და მისი ხელმარჯვეობითაც ყველა ძალიან კმაყოფილია!

ტასო სულ ახლახანს დაგვიბრუნდა საფრანგეთიდან, თეატრალური ფესტივალითა და მასპინძლებით აღფრთოვანებული და მოგზაურობაზე შეყვარებული! ის და ჩვენი სამი ბენეფიციარი „ჩართეს“ ფრანგული პარტნიორისა და დონორის (Secours populaire du rhone) დაფინანსებით გავამგზავრეთ. როგორც ჯგუფის დანარჩენმა წევრებმა გვიამბეს, ტასომ ყველა თავისი ორგანიზებულობითა და მობილიზებულობით მოხიბლა. დარწმუნებულები ვართ, ეს თვისებები ძალიან გამოადგება, როცა საკუთარ სალონს გახსნის! იხილეთ სრულად

ჩართულია

ნიკა

გაიცანით 17 წლის ნიკა მეჯვრისხევიდან! ოქროსმედალოსანი აბიტურიენტია და უნივერსიტეტში ჩასაბარებლად მომზადებას დამოუკიდებლად აპირებს - მთავარი იარაღი უკვე აქვს  - ინტერნეტი, კომპიუტერი და შემართება.

პროფესიის არჩევისას ნიკამ ორი მთავარი მისწრაფება გააერთიანა - ხატვა და ტექნიკური საგნების სიყვარული. აპირებს ავტომობილების ინჟინერია და დიზაინი ისწავლოს. ხატვა 3 წლის წინ, დამოუკიდებლად დაიწყო - თავიდან მხოლოდ ფანქრით ხატავდა, ახლა კი ინტერნეტის საშუალებით ახალ ხატვის ტექნიკებს  სწავლობს. დამოუკიდებლად ძირითადად პორტრეტებს ხატავს ხოლმე, ხოლო ინტერნეტის საშუალებით მანქანების მოდელების სქემებს იძიებს. ნიკა ინგლისურსაც აქტიურად სწავლობს - მისთვის საჭირო მასალები ქართულად უბრალოდ არც მოიპოვება.

როგორც გვითხრა, ინტერნეტი რომ არ ჰქონოდა, პანდემიის დროს ვერც  გაკვეთილებზე დასწრებას და ვერც მეცადინეობას მოახერხებდა. ინტერნეტის დახმარებით კი მაღალ ნიშნებზე სწავლა დისტანციურადაც მოახერხა. ამასთან, აღმოაჩინა, რომ ძველი ფილმების ყურება უყვარს და გიტარაზე დაკვრასაც ონლაინ, დამოუკიდებლად სწავლობს

ჩართულია

მარეხი

მარეხი 2020 წელს ჩავრთეთ -  სწორედ მაშინ, ყველაფერი რომ გაჩერდა და პროდუქტიულობის, სამყაროსთან წვდომის ერთადერთ საშუალებად ინტერნეტი რომ დაგვრჩა. ამ დროს მარეხი აბიტურიენტი იყო და ინტერნეტი რომ არა, ვერც გაკვეთილებს დაესწრებოდა, ვერც გამოცდებისთვის მოემზადებოდა და მისი აზრით, ვერც სტუდენტი გახდებოდა. ხანის აკადემიასთან ერთად მისი სკოლის ყველა მასწავლებელმა უეცრად ვირტუალურ რეალობაში გადაინაცვლა. მარეხმაც ბეჯითად გამოიყენა ყველა ონლაინ რესურსი, ტესტი და გაკვეთილი და დღეს ახალი ცხოვრებით ცხოვრობს  - უკვე სტუდენტია. 

მარეხი მომავალი არქიტექტორია. გოეთეს ეთანხმება, რომ არქიტექტურა დროში გაყინული მუსიკაა და ცდილობს, რაც შეიძლება მეტ “ნაწარმოებს” გაეცნოს, მეტი იმოგზაუროს - თუნდაც ვირტუალურად და შთაბეჭდილებები პროფესიულ შთაგონებად აქციოს. ვინაიდან მასალების უმეტესობა ინგლისურადაა, მარეხი ინგლისურშიც აქტიურად მეცადინეობს - ხან აპლიკაციების დახმარებით, ხანაც თუნდაც ფილმების ინგლისურად ყურებით. 

სწავლის გაგრძელება იტალიაში უნდა, რაც, ალბათ, არქიტექტურის ყველა სტუდენტის ოცნებაა. მაგრამ მარეხი მხოლოდ ოცნებით არ შემოიფარგლება - ინგლისურთან ერთად, იტალიურსაც სწავლობს და ერთი სული აქვს, როდის ექნება საშუალება, პირადადაც ნახოს ხელოვნების ის ნიმუშები, რომლებსაც ვირტუალურად უკვე კარგად იცნობს.

ჩართულია

ნინი

გაიცანით მწერლობითა და ფოტოგრაფიით გატაცებულ ნინი, თელავის სოფელ ართანადან!

18 წლის ნინიმ წერის ნიჭი პანდემიის დროს აღმოაჩინა. თავდაპირველად ძალიან მორცხვობდა, თავის ნაწერებს მალავდა და არავის აკითხებდა, თუმცა როდესაც ინტერნეტში პლატფორმა „4love.ge“ აღმოაჩინა და თანატოლების მოთხრობები ნახა, თავდაჯერებულობა მოემატა და მასაც მოუნდა თავისი ამბის გამოქვეყნება. ასეც მოიქცა - თავისივე დაწერილი ისტორია „ორ სამყაროს შორის“ მართლაც გაუზიარა ფართო აუდიტორიას!  

ნინის ფოტოგრაფია იტაცებს  - ფოტოებს არამარტო მეგობრებს, არამედ გარშემო ყველაფერს უღებს. განსაკუთრებით ვინტაჟური სტილში. ძალიან უყვარს წიგნების კითხვა, გვიყვება, რომ კომპიუტერის მიღების შემდეგ მხატვრულ ლიტერატურას ონლაინ უფრო ეცნობა, რადგან ინტერნეტში “უსაზღვრო რაოდენობის მასალებზეა წვდომა”. ამის გარდა, მისივე თქმით ცხოვრება ფილმების ყურების გარეშე ვეღარ წარმოუდგენია. მეგობრებს კრებს და თავისი ლეპტოპით “კინოჩვენებებს” აწყობს!

ამ დროისთვის ნინი სამართლის ფაკულტეტზე სწავლობს, კომპიუტერით საჭირო მასალებს იძიებს და თავის საყვარელ ჰობებზეც არ ამბობს უარს.

მხარდამჭერები

ნინო ნანიტაშვილი
ნინო ნანიტაშვილი

აღმასრულებელი დირექტორი, Innovation Support Fund

„ჩართეს დონორობა არის უმარტივესი გზა, იქონიო გავლენა ერთი მოსწავლის ცხოვრებაზე, მისცე მას განვითარების საშუალება.“ იხილეთ სრულად

აღმასრულებელი დირექტორი, Innovation Support Fund

ნინო ქაშიბაძე
ნინო ქაშიბაძე

მარკეტინგის დირექტორი, „ვანდიო“

„ჩართეთი ვაკეთებთ ინვესტიციას უკეთესი გარემოს შესაქმნელად, რომ ჩვენ, ჩვენმა მეგობრებმა და შემდეგ ჩვენმა შვილებმა უკეთეს ქვეყანაში იცხოვრონ.“ იხილეთ სრულად

მარკეტინგის დირექტორი, „ვანდიო“

ნიკოლოზ ალავიძე
ნიკოლოზ ალავიძე

ეკონომიკისა და მდგრადი განვითარების მინისტრის მოადგილე

„ამ პროექტში მონაწილეობა არის დიდი პატივი ყველასთვის და მეც გამიმართლა, რომ გავიგე მასზე. ინტერნეტი არის არა მხოლოდ მნიშვნელოვანი, არამედ აუცილებელიც.“ იხილეთ სრულად

ეკონომიკისა და მდგრადი განვითარების მინისტრის მოადგილე

სანი ორველაშვილი
სანი ორველაშვილი

გრაფიკული დიზაინერი, Hans & Gruber

#მეჩავრთე, რადგან საუკეთესო ქველმოქმედებაა და მიხარია რომ ამ ახალგაზრდებს მცირედით ვეხმარები. იხილეთ სრულად

 

გრაფიკული დიზაინერი, Hans & Gruber

ელენე ლაცოშვილი
ელენე ლაცოშვილი

პროგრამული უზრუნველყოფის არქიტექტორი

„რეპორტაჟებიდანაც ჩანს, თუ როგორ გულით უდგება „ჩართეს“ გუნდი ამ მისიას. ისინი საშუალებას გვაძლევენ, მარტივად გავხდეთ მნიშვნელოვანი საქმის ნაწილი.“

პროგრამული უზრუნველყოფის არქიტექტორი

მარი ნიკურაძე
მარი ნიკურაძე

OC Media-ს თანადამფუძნებელი, დირექტორი

#მეჩავრთე რადგან კომპიუტერი და ინტერნეტი აუცილებლად გაზრდის მოსწავლეების სწავლის ხარისხს, არამარტო სწავლის, არამედ ზოგადად მათ მსოფლმხედველობას. იხილეთ სრულად

OC Media-ს თანადამფუძნებელი, დირექტორი

თათია მემარნიშვილი
თათია მემარნიშვილი

იაპონური ენის ლექტორი, თსუ

"ძალიან მინდა, საქართველოში ყველა ახალგაზრდას, ყველა ბავშვს ჰქონდეს წვდომა ინტერნეტთან. 21-ე საუკუნეში განათლების მიღება ამის გარეშე ურთულესია. არ უნდა ჩამოვრჩეთ მსოფლიოს". იხილეთ სრულად

იაპონური ენის ლექტორი, თსუ

ომარ ტერტერაშვილი
ომარ ტერტერაშვილი

აკადემიის მენეჯერი, საერთაშორისო აუდიტორული კომპანია ნექსია თიეი

#მეჩავრთე რადგან ინტერნეტის გარეშე თანამედროვე სამყაროში შეუძლებელია ფეხი აუწყო და დაეწიო ყველა სიახლესა და გამოწვევას. იხილეთ სრულად

 

 

აკადემიის მენეჯერი, საერთაშორისო აუდიტორული კომპანია ნექსია თიეი

მელანო დურმიშიძე
მელანო დურმიშიძე

ბიზნეს განვითარების მენეჯერი, Sarke Studio

„ვფიქრობ, მოქალაქეობრივი პასუხისმგებლობაა, ხელი შევუწყოთ ერთმანეთს ზრდაში. კომპიუტერი და ინტერნეტი კი ჩვენი განვითარების მნიშვნელოვანი ნაწილია.“ იხილეთ სრულად

ბიზნეს განვითარების მენეჯერი, Sarke Studio

მარიამ საღარეიშვილი
მარიამ საღარეიშვილი

ეკონომისტი, საქართველოს ეკონომიკისა და მდგრადი განვითარების სამინისტრო

„ინტერნეტი და კომპიუტერი ჩემი ყოველდღიურობის განუყოფელი ნაწილია, ამიტომ მომინდა, სხვა ახალგაზრდებსაც დავხმარებოდი ამის მიღებაში.“

ეკონომისტი, საქართველოს ეკონომიკისა და მდგრადი განვითარების სამინისტრო

ერეკლე ძოწენიძე
ერეკლე ძოწენიძე

ექიმი, ტალინის ცენტრალური საავადმყოფო

„ინტერნეტი ინფორმაციის უალტერნატივო წყაროა. მასთან წვდომა ყველას უნდა ჰქონდეს, რომ მიიღონ განათლება, ფეხი აუწყონ ცვლილებებს, რომლებიც გლობალიზაციას მოაქვს.“ იხილეთ სრულად

ექიმი, ტალინის ცენტრალური საავადმყოფო

თაკაკა აბრამია
თაკაკა აბრამია

კრეატიული დირექტორი, სტუდია იმპულსი

„ვთვლი, რომ ეს პროექტი ჩვენი ქვეყნის ნათელი მხარეა. „ჩართეზე“ ყველაფერი ძალიან გამჭვირვალეა. ჩემით ვირჩევ, რაზე უნდა დაიხარჯოს თანხა.“ იხილეთ სრულად

კრეატიული დირექტორი, სტუდია იმპულსი

ანა სხილაძე
ანა სხილაძე

კომუნიკაციების და საზოგადოებრივი პროექტების მენეჯერი, JTI

„ჩართე უბრალოდ საუკეთესო პროექტია დღევანდელ საქართველოში. იდეა, მისია, შესრულება, გამჭვირვალობა და გაზომვადი, ხილული შედეგი.“

კომუნიკაციების და საზოგადოებრივი პროექტების მენეჯერი, JTI

ლალი ოქროშიძე
ლალი ოქროშიძე

დოქტორანტი, ეკონომიკისა და ბიზნესის ფაკულტეტი

მომწონს, რომ ვხედავ რაზე იხარჯება სახსრები; მესამე, ბავშვები და მათი ისტორიები მაძლევენ იმის შეგრძნებას, რომ ისინი არ დაკარგავენ დროს ტყუილად ინტერნეტში. იხილეთ სრულად

დოქტორანტი, ეკონომიკისა და ბიზნესის ფაკულტეტი

გიორგი გოგიჩაიშვილი
გიორგი გოგიჩაიშვილი

ასორტიმენტის განვითარების ხელმძღვანელი, შპს "თერმორუმი"

იმედი მაქვს, რომ ჩემი მეგობრებიც გახდებიან აღნიშნული პროექტის დონორები. ჩაერთეთ პროგრამაში, მივცეთ მაგალითი სხვებს და გავიბედნიეროთ თავი სიკეთის კეთებით. იხილეთ სრულად

 

ასორტიმენტის განვითარების ხელმძღვანელი, შპს "თერმორუმი"

მიკო შახდინარიანი
მიკო შახდინარიანი

პროექტის კოორდინატორი, თბილისი პრაიდი

მომწონს პროექტის იდეა და ვენდობი თქვენს გუნდს. თუ აფასებთ ინტერნეტს, როგორც რესურსს და თვლით, რომ იგი ყველასთვის უნდა იყოს ხელმისაწვდომი, აუცილებლად დაუჭირეთ მხარი. იხილეთ სრულად

 

პროექტის კოორდინატორი, თბილისი პრაიდი

მარიკა ზაქარაძე
მარიკა ზაქარაძე

მედია კოორდინატორი, „თავისუფალ ჟურნალისტთა სახლი“

თუ გჯერათ ან გსურთ, რომ  ქვეყანას ჰქონდეს უკეთესი მომავალი, ამ საქმეში თქვენთვის უცნობი პატარა ადამიანების მხარდაჭერით შეგიძლიათ, განუზომელი წვლილი შეიტანოთ.

მედია კოორდინატორი, „თავისუფალ ჟურნალისტთა სახლი“

ლაშა ქერდიკაშვილი
ლაშა ქერდიკაშვილი

უფროსი მრჩეველი, Ernst & Young Germany

როგორ შეგვიძლია, ინდივიდუალურად რაიმე შევცვალოთ? ჩართეთი ამ კითხვაზე ვიპოვე პასუხი, რადგან ზუსტად ის პროექტია, სადაც თუნდაც 1 ლარით დიდი საქმის კეთება შეგვიძლია.

უფროსი მრჩეველი, Ernst & Young Germany

მაო გალუაშვილი
მაო გალუაშვილი

ვეტერინარი, აგრარული უნივერსიტეტი

„საიტის გაცნობისთანავე ჩავერთე. დავინახე ის ორგანიზებულობა, რაც მაკლდა. პლატფორმა მარტივი და გამჭვირვალეა, მაშინვე გამიჩნდა ნდობის ფაქტორი." იხილეთ სრულად

ვეტერინარი, აგრარული უნივერსიტეტი

დავით შერვაშიძე
დავით შერვაშიძე

პროგრამის ოფიცერი, საერთაშორისო რესპუბლიკური ინსტიტუტი

„ძალიან კარგი პროექტია. ეს არის თქვენი წვლილი ქვეყნის განვითარებაში, იმიტომ რომ წარმატებული მოქალაქეები ქმნიან წარმატებულ ქვეყანას!“

პროგრამის ოფიცერი, საერთაშორისო რესპუბლიკური ინსტიტუტი

გიორგი წიფიანი
გიორგი წიფიანი

აღმასრულებელი დირექტორი, GT Network

„ინტერნეტი საუკეთესო რამაა ბორბლის შემდეგ, რაც კი გამოუგონია კაცობრიობას. ისეთი განცდა მაქვს, თითქოს საშვილიშვილო საქმეს ვაკეთებ.“

აღმასრულებელი დირექტორი, GT Network

ლელა ბასილაია
ლელა ბასილაია

„როდესაც აძლევ ადამიანს ინფორმაციას, აძლევ ახალ ცოდნას, უხსნი ახალ თვალსაწიერს და ფაქტობრივად აძლევ მას ახალ სიცოცხლეს.“

მაკა სართანია
მაკა სართანია

მშვიდობისა და განვითარების აკადემიის აღმასრულებელი დირექტორი

„ჩართე ქველმოქმედების ერთ-ერთი ყველაზე გონივრული, ეფექტიანი ხერხია. ეს ინვესტიციაა ჯანსაღ, გახსნილ, გონიერ და პროგრესულ ქართულ საზოგადოებაში.“

მშვიდობისა და განვითარების აკადემიის აღმასრულებელი დირექტორი

კახა ჟღენტი
კახა ჟღენტი

მასწავლებელთა პროფ. განვითარების სქემის პროგრამის მენეჯერი

„თქვენ აძლევთ შანსს ბავშვს, ცხოვრებაში მიაღწიოს ოცნებების ასრულებას, ააშენონ უკეთესი საქართველო. მივცეთ ჩვენს შვილებს ჩვენზე ბედნიერი მომავლის შანსი!“ იხილეთ სრულად

მასწავლებელთა პროფ. განვითარების სქემის პროგრამის მენეჯერი

მარიკა ფალიანი
მარიკა ფალიანი

ფინანსური მენჯერი, Lisi Lake Development

„ჩვენი მინიმალური ძალისხმევით ბავშვებს ეძლევათ საშუალება ჰქონდეთ წვდომა კომპიუტერთან და ინტერნეტთან, რაც მათ მისცემს საშუალებას, მიიღონ განათლება დისტანციურად.“ იხილეთ სრულად

ფინანსური მენჯერი, Lisi Lake Development

თეა სხიერელი
თეა სხიერელი

მოწვეული ლექტორი, ჯიპა

"ნუ მოიკლებთ ბედნიერებას, მიანიჭოთ ახალგაზრდებს სიხარული, მათთვის ხელმისაწვდომი გახადოთ ინტერნეტი და ამით განვითარების შანსი მისცეთ. იხილეთ სრულად"

 
 

მოწვეული ლექტორი, ჯიპა

ლელა გრიგალაშვილი
ლელა გრიგალაშვილი

რესტავრატორ/კონსერვატორი, თანამედროვე ხელოვნების გალერეა Window Project

"აუცილებლად გახდით დონორები და ყოველთვის გაბედნიერდებით ჩართეს ანგარიშების მიღებით, სადაც ბენეფიციარების წარმატებებზე გვიყვებიან". იხილეთ სრულად

რესტავრატორ/კონსერვატორი, თანამედროვე ხელოვნების გალერეა Window Project

ნინო გოგალაძე
ნინო გოგალაძე

რედაქტორი, ბაკურ სულაკაურის გამომცემლობა

"ჩემთვის „ჩართეს“ დონორობა არის გრძნობა, რომ ახალგაზრდების განათლებაში თუნდაც უმცირესი წვლილი შემაქვს"

რედაქტორი, ბაკურ სულაკაურის გამომცემლობა

მე ჩავრთავ

თქვენ გახდებით 4676-ე მხარდამჭერი