დღეს ბექას გაგაცნობთ - მიზანდასახულ ინჟინერიის სტუდენტს წალკიდან! 

ბექასთან ლეპტოპი 2020 წლის სექტემბერში ჩავიტანეთ, მაშინ როცა კოვიდპანდემიის გამო მთელი ქვეყნის სკოლები ონლაინ სწავლობდნენ. ბექა ამ დროს აბიტურიენტი იყო და როგორც თავად გვიყვება, კომპიუტერის უქონლობის გამო, ვერც გაკვეთილებს ესწრებოდა და დამატებით მასწავლებლებთან მომზადებასაც ვერ ახერხებდა. ეს რეალობა მალე შეიცვალა... ბექამ ინტენსიური მეცადინეობა დაიწყო და წლის ბოლოს სასურველ მიზანსაც მიაღწია - ქართულ-ამერიკულ უნივერსიტეტში ჩააბარა ინჟინერიის ფაკულტეტეზე!

ახლა უკვე მე-4 კურსზეა და ბევრს შრომობს, რომ კარგი ინჟინერი დადგეს. პირველ კურსზე დისტანციური სწავლის გამო წალკიდან ერთვებოდა ლექციებს, თუმცა ახლა უკვე ნამდვილი სტუდენტობა აქვს და თავს ბედნიერად გრძნობს. თავისუფალ დროს სპორტული აქტივობებითაა დაკავებული - ფეხბურთს ან ფრენბურთს თამაშობს ან ცხენით ჯირითობს. 

ბექას თქმით, მისი ინფორმაციის მთავარი წყარო ინტერნეტია, თუმცა პიროვნულ ზრდაში წიგნების კითხვა და ფილმების ყურებაც ეხმარება.

ლიზი აბიტურიენტია და როცა გავესაუბრეთ სულ პირველი თავისი ეროვნული გამოცდების ქულები გვახარა: ქართულში - 56/60, ინგლისურში - 64/70, მათემატიკისა და ფიზიკის შედეგებს კი ჯერ კიდევ ელოდება. გვიამბო, რომ ონლაინ ტესტებზე ვარჯიშსა და პროგრამული მასალის ეფექტურად დამუშავებაში ინტერნეტი ძალიან დაეხმარა!

ტექნიკური საგნები უყვარს და ფაკულტეტიც შესაბამისი შეარჩია - სურს კომპიუტერულ მეცნიერებებზე ჩააბაროს ქუთაისის საერთაშორისო უნივერსიტეტში. პროგრამირების ენების დამოუკიდებლად სწავლა უკვე დაიწყო და როგორც გვითხრა, ჯავასკრიპტის თითქმის ნახევარი იცის, Bitcamp-ისა და ხანის აკადემიის რესურსებს იყენებს.

პროგრამირების გარდა, ლიზის ვიდეომონტაჟიც გამოსდის. სულ ახლახანს ხარაგაულში, ტურისტულ კომპანია “My Trip”-ში, დაიწყო მუშაობა და მათი სოციალური მედიისთვის ვიდეოებს ქმნის, ამის გარდა ტურისტებთან ინგლისურად კომუნიკაცია ევალება და ფიქრობს, რომ საკუთარი ლეპტოპის საშუალებით საქმეს წარმატებით ართმევს თავს. 

ლიზის წარმატებებს ვუსურვებთ, ჩვენი მოსწავლეების პროგრესის ამბები ყველაზე მეტად გვიხარია!

ხატვის ნიჭით დაჯილდოებულ, მებრძოლ გოგოზე უნდა მოგიყვეთ ქალაქ ჯვარიდან!

იცნობთ მოზარდებს, მშობლიური ქალაქის უკეთესობისკენ შეცვლაზე რომ გულანთებულები ფიქრობენ? 16 წლის მარიამი ზუსტად ასეთია. გადაწყვეტილი აქვს, იბრძოლოს, რომ ჯვრის მომავალ თაობას იმ დაბრკოლებების გადალახვა აღარ მოუწიოს, რაც მას შეხვდა. სჯერა, რომ ინტერნეტით და კომპიუტერით უკვე მთელ მსოფლიოსთან აქვს წვდომა.

მარიამი ბავშვობიდან ხატავს. მეექვსე კლასიდან არქიტექტორობა დაისახა მიზნად. უკვე მე-11 კლასში “ჩართეს” ნაჩუქარ ლეპტოპსაც დაუმეგობრდა და დამოუკიდებლად დიზაინების შექმნაც დაიწყო. 

2021 წელს „კოდის ერთი საათის“ კვირეულის ფარგლებში 3D პროექტები შექმნა და საქართველოს მასშტაბით კონკურსის ფინალშიც გავიდა! თავისუფალ დროს ნახატების გარდა, ესკიზებსაც ქმნის - ინტერნეტის საშუალებით მისი საოცნებო სახლის დიზაინი შექმნა და დააპროექტა კიდეც. გვიყვება, რომ ინფორმაციის მოძიება და სკოლის დავალებების შესრულება უკვე სრულყოფილად შეუძლია, კომუნიკაციის უნარებიც განივითარა.

როგორც გვითხრა, გადაწყვეტილი აქვს მაგისტრატურაზე არქიტექტურა აშშ-ში შეისწავლოს, შემდეგ კი საქართველოში დაბრუნდეს და სფერო განავითაროს. ოცნებობს, რომ თავი საქართველოსაც და მსოფლიოსაც დაამახსოვროს!

17 წლის სუპერ ცნობისმოყვარე ელისოზე გიამბობთ, ჭიათურის სოფელ წირქვალიდან!

ელისო აბიტურიენტია, თუმცა მისი ყოველდღიურობა მხოლოდ მასწავლებლებთან სიარულით და თემების წერით სულაც არ შემოიფარგლება. ახერხებს დრო გამონახოს, არაფორმალური განათლების პროექტებში ჩაერთოს და საკუთარი თავი ასე განავითაროს. მისი თქმით, ძალიან უნდა წვლილი შეიტანოს თავისი ქალაქისა და ქვეყნის განვითარებაში. მხარში აქტიური მეგობრები უდგანან, მათთან ერთად სხვადასხვა გარემოსდაცვით და კულტურულ აქტივობებს გეგმავს!

ელისო დარწმუნებით ამბობს, რომ პასუხგაუცემელ კითხვებზე ინფორმაციის მოძიების სტიმული სწორედ კომპიუტერმა მისცა. იტაცებს მხატვრული ლიტერატურის კითხვა და ხატვა, თუმცა თავს ხელოვნად არ მიიჩნევს. როგორც გვიამბო, ინტერნეტის საშუალებით საინტერესო ნახატებს ეცნობა და სხვადასხვა ეპოქებშიც დამოგზაურობს.

აბიტურიენტისთვის ყველაზე აქტუალურ საკითხზე - პროფესიაზე - როდესაც ვკითხეთ ასე გვიპასუხა:  “მრავალი მიმდინარეობა მაინტერესებს, თუმცა გამორჩეულად მიზიდავს პოლიტიკის მეცნიერებები და სოციოლოგია. იმედია ზუსტად ისე ჩავაბარებ გამოცდებს, როგორც მინდა.” 

ელისოს წინ შრომატევადი წელი და გამოცდები ელის, თუმცა გვჯერა, რომ შრომისმოყვარეობითა და დროის სწორედ განაწილებით მიზანს აუცილებლად მიაღწევს.

ლუკა მდინარე ენგურის პირას, ქალაქ ჯვარში ცხოვრობს, მისი გული კი სკანდინავიის მთებს ეკუთვნის. ინტერნეტმა მომავალი პროფესია აღმოაჩენინა და ოცნებების მრავალფეროვანი სიაც შეავსებინა!

ლუკამ გადაწყვიტა, ერთ-ერთ ყველაზე უჩვეულო ფაკულტეტზე — სკანდინავიური ენების ფილოლოგიაზე — ისწავლოს, თბილისის სახელმწიფო უნივერსიტეტში. რითი გაიტაცა სამეგრელოს პატარა ქალაქში მცხოვრები ბიჭი შორეულმა სამყარომ? ზამთარი ლუკას საყვარელი წელიწადის დროა; გრძელი, ცივი ზამთრით განთქმულმა ჩრდილოეთმა, შემდეგ კი მამაცმა ვიკინგებმა და ნორვეგიულმა ფილმებმა მისი გონება საბოლოოდ მოიცვა. 

რა გასაკვირია, რომ ლუკას სურვილების სიაში პირველი ჩრდილოეთის ციალის ნახვა წერია. სხვა ოცნებებიც გაგვიმხილა - ყველაზე გრძელი გვირაბის (Gotthard Base Tunnel) გავლა ნორვეგიაში, ზამთრის ოლიმპიურ თამაშებზე დასწრება, შუაღამის მზის, ოსლოს, სტოქჰოლმის, ლონდონის და ინგლისის ქალაქ ბიბურის ხილვა. 

ახლა აბიტურიენტია და კომპიუტერი „ძვირფას დროს უზოგავს”. ყველა საჭირო ინფორმაცია ერთ სივრცეში — ინტერნეტშია თავმოყრილი. გვიყვება, რომ ლეპტოპის გარეშე ვერც ონლაინ გაკვეთილებს დაესწრებოდა და ვერც  წიგნების ელექტრონული ვერსიებით მოემზადებოდა ეროვნული გამოცდებისთვის. თავისუფალ დროს კომიქსების კითხვას და ანიმეებს ყურებას უთმობს.

გვჯერა, რომ ლუკა აუცილებლად აისრულებს ოცნებებს და ჩრდილოეთის ციალსაც ნახავს!

გაიცანით 16 წლის ნიკა, რომელიც მეტეოროლოგიითაა გატაცებული!

ნიკა იმერეთში, სოფელ ხიდარში ცხოვრობს. გარშემო ვინმეს ამინდთან დაკავშირებით რამე თუ აინტერესებს ხშირად მას ეკითხებიან ხოლმე. თითქმის ყოველდღე აკვირდება ცას - ღრუბლებს, ვარსკვლავებს, ფრინველებს - შემდეგ კი კლიმატის ცვალებადობას ინიშნავს და დასკვნებსაც აკეთებს. 

ინტერნეტით ამინდის გამოცნობის ბევრი სხვადასხვა ხერხი მოიძია. როგორც თავად გვიამბობს, უკვე იმდენი ინფორმაცია შეაგროვა, ველურ ბუნებაში, უინტერნეტოდაც კი შეძლებს კლიმატის ,,წინასწარმეტყველებას".

რაც შეეხება ნიკას სამომავლო პროფესიას, ჯერ არ გადაუწვეტია. ჯერჯერობით ცისარტყელაზე, წითელ ღრუბლებსა და ცხოველებზე დაკვირვებას აგრძელებს დიდი მონდომებით!

დღეს სამხრეთ კორეულ კულტურაზე შეყვარებულ ქეთის გაგაცნობთ წყალტუბოდან!

ქეთის პროფესია დიდი ხანია გადაწყვეტილი აქვს - მოდის დიზაინერობა - თუმცა, როცა საქმე უნივერსიტეტის არჩევაზე მიდგა, ინფორმაციის მოსაძიებლად ინტერნეტს მიაკითხა და ახლა მრავალი ვარიანტიდან ერთ-ერთის ამორჩევის პროცესშია. პარალელურად გამოცდებისთვის ტესტებს აკეთებს და კონსპექტებს წერს hubu.ge-დან. 

ყველაზე კარგად ხატვა გამოსდის. სამხატვრო სკოლაში უკვე 6 წელია დადის და წლის ბოლოს გამოფენაც ექნება! 2 ტილო უკვე მზად აქვს, ახლა კი 3 უზარმაზარ ნახატზე მუშაობს. 

ქეთი სამხრეთ კორეული მუსიკის, ფილმებისა და სერიალების ნამდვილი ფანია. კომპიუტერით ამ ენის შესწავლაც დაიწყო - პირველ რიგში დათვლა, მერე კი მრავალი წინადადება ისწავლა. სამწუხაროდ, სირთულის გამო, თავი დაანებება მოუწია, თუმცა გვპირდება, რომ აუცილებლად დაუბრუნდება. ძნელია არ დავუჯეროთ, მასთან საუბარმა დაგვარწმუნა როგორი ინტერესიანი და შრომისმოყვარეა!

P.S. ყოველ დილას 8 საათზე სავარჯიშოდ იღვიძებს და მთელ დღეს ენერგიულად ატარებს.

დღეს ჭიათურელ მარიამზე მოგიყვებით, რომლის პროექტითაც საქართველოს სამ ქალაქში მზის პანელები დამონტაჟდება!

მარიამი სოფელ რგანში ცხოვრობს. სკოლაში მხოლოდ 80 მოსწავლეა, მაგრამ ყველამ იცის, რომ თუ კომპიუტერი სჭირდებათ მასთან უნდა მივიდნენ - დაეხმარება და დაყვედრების გარეშე ათხოვებს. მარიამს არ სურს სხვას ის გამოაცდევინოს, რაც თვითონ გაიარა. მიზნადაც განათლების სისტემის შეცვლა აქვს დასახული, უნდა თავისი წვლილი შეიტანოს და ეს მხოლოდ ოცნებად არ დარჩეს.

გარემოსდაცვითი ორგანიზაცია CENN-ის კონკურსში თავის სკოლელებთან და მასწავლებელთან ერთად იმონაწილევა. მათი იდეა დაფინანსდა - ჭიათურაში, ზესტაფონსა და ტყიბულში მზის პანელები დამონტაჟდება. ეკოაქტივისტობის გარდა, მარიამს ჟურნალისტობაც გამოსდის. დაიჯერებთ? თავისი გადაცემებს, რეპორტაჟებს აკეთებს და მულტფილმებსაც ახმოვანებს!

სკოლის სპეკტაკლებში მონაწილეობს და სცენარებიც დაუწერია. ზოგჯერ, კი თავს ოპერის მომღერლად ხედავს - ჩართავს ქართულ არიებს, აჰყვება და თავს სცენაზე წარმოიდგენს.

ახლა, როცა უკვე კომპიუტერი აქვს, მისი ყოველდღიურობა შეიცვალა. სკოლაში გაკვეთილების მომზადებისას სულ ცდილობს კანვას პროგრამით ანიმაციები შექმნას და ბავშვებს გაუზიაროს. მისი თქმით, ახსნა იმდენად კარგად გამოსდის, რომ ბიოლოგიის მასწავლებელმა გაკვეთილიც კი ჩაატარებინა. წელს აბიტურიენტია და გამოცდებისთვის საგულდაგულოდ მოემზადება

გაიცანით 17 წლის ნიკა მეჯვრისხევიდან! ოქროსმედალოსანი აბიტურიენტია და უნივერსიტეტში ჩასაბარებლად მომზადებას დამოუკიდებლად აპირებს - მთავარი იარაღი უკვე აქვს  - ინტერნეტი, კომპიუტერი და შემართება.

პროფესიის არჩევისას ნიკამ ორი მთავარი მისწრაფება გააერთიანა - ხატვა და ტექნიკური საგნების სიყვარული. აპირებს ავტომობილების ინჟინერია და დიზაინი ისწავლოს. ხატვა 3 წლის წინ, დამოუკიდებლად დაიწყო - თავიდან მხოლოდ ფანქრით ხატავდა, ახლა კი ინტერნეტის საშუალებით ახალ ხატვის ტექნიკებს  სწავლობს. დამოუკიდებლად ძირითადად პორტრეტებს ხატავს ხოლმე, ხოლო ინტერნეტის საშუალებით მანქანების მოდელების სქემებს იძიებს. ნიკა ინგლისურსაც აქტიურად სწავლობს - მისთვის საჭირო მასალები ქართულად უბრალოდ არც მოიპოვება.

როგორც გვითხრა, ინტერნეტი რომ არ ჰქონოდა, პანდემიის დროს ვერც  გაკვეთილებზე დასწრებას და ვერც მეცადინეობას მოახერხებდა. ინტერნეტის დახმარებით კი მაღალ ნიშნებზე სწავლა დისტანციურადაც მოახერხა. ამასთან, აღმოაჩინა, რომ ძველი ფილმების ყურება უყვარს და გიტარაზე დაკვრასაც ონლაინ, დამოუკიდებლად სწავლობს

ყველაფერი იქიდან დაიწყო, რომ ქეთა ჩართეს კომპიუტერთან ერთად გადაცემულ საგანმანათლებლო პროგრამების სიას ცნობისმოყვარეობით ჩაუჯდა - რამე კონკრეტულ საგანში დახმარება არ სჭირდებოდა, უბრალოდ შთაგონების წყაროს ეძებდა. მაშინ ჩართეს ერთ-ერთი პარტნიორი, @Digital bus-ი, ჩვენს ბენეფიციარებს უფასო ონლაინ კურსებს სთავაზობდა ინტერიერის დიზაინში და ქეთაც მაშინვე ჩაეწერა. 

ქეთა კურსზე ყველაზე პატარაა, მაგრამ მონდომებისა და შემოქმედებითი ნიჭის წყალობით ყველა სირთულეს ლახავს და ლექტორის ქებასაც იმსახურებს. საკუთარი პროგრესით თავადაც კმაყოფილია - ფიქრობს რომ, იპოვა ის, რისი კეთებაც მართლა აინტერესებს და აპირებს, ინტერიერის დიზაინი პროფესიად აქციოს. როგორც მოგვიყვა, ადრე კერვის კურსებზეც დადიოდა, რასაც დღემდე აქტიურად იყენებს საკუთარი სამოსის დიზაინის შესაცვლელად და გასახალისებლად, ახლა კი მის შემოქმედებით ნიჭს ახალი გასაქანი მიეცა.

ქეთამ უკვე მოიძია ყველა ის უნივერსიტეტი და კურსი, სადაც შეძლებს, ინტერიერის დიზაინი უკეთ შეისწავლოს - გაარკვია, რა საგნები ბარდება და როგორ უნდა მოემზადოს. აღფრთოვანებას მეგობრებსაც უზიარებს და ერთ-ერთი მათგანი აპირებს კიდეც, მას ამ პროფესიულ თავგადასავალში შემოურთდეს - ერთად ეცნობიან სხვადასხვა მიმდინარეობებს, ოცნებობენ და წარმოიდგენენ, როგორი იქნება, გქონდეს ისეთი პროფესია, რომელიც მოგწონს და შეძლო დამოუკიდებლად ცხოვრება. ამ მიზნის მისაღწევად კი მხოლოდ მონდომება და ინტერნეტის უსაზღვრო შესაძლებლობების გამოყენება სჭირდებათ. იხილეთ სრულად

ბავშვობაში თქვენც ოცნებობდით მეზღვაურობაზე? წარმოიდგენდით როგორ მიაპობს თქვენი გემი ხან ბობოქარ ტალღებს, ხანაც კი მშვიდ ოკეანეში მილივლივებს? გიფიქრიათ როგორია ცხოვრება, როცა შენი ყოველდღიურობა ხან საზღვაოსნო ფუსფუსს, ხანაც კი ახალ-ახალი ქალაქების, პორტების, კულტურების, ხალხის გაცნობას მოიცავს? გაიცანით ლაშა - ბიჭი, რომელსაც არამხოლოდ უოცნებია მეზღვაურის ცხოვრებაზე, არამედ დეტალურად აქვს ნაფიქრი, როგორ აქციოს ბევრის ბავშვობის ფანტაზია რეალობად.

ლაშა ქობულეთში დაიბადა და გაიზარდა. ახლა კი სკოლის დამთავრებისთვის და საზღვაო აკადემიაში გამოცდების ჩაბარებისთვის ემზადება. მისი მომავლის გეგმების ინსპირაციას ინტერნეტს ნამდვილად ვერ დავაბრალებთ - ეს ოცნება ზღვის, მეზღვაური მეგობრების და ნათესავების შემხვედვარეს გაუჩნდა, თუმცა ინტერნეტი ოცნების ასრულებაში  ეხმარება. ინფორმაციის მოძიება, გამოცდებისთვის მომზადება, ონლაინ გაკვეთილებზე დასწრება - ყველა ის ნაბიჯი, რაც მეზღვაურობამდე აშორებს, კომპიუტერის საშუალებით აქვს შესასრულებელი. ლაშაც მონდომებით ეკიდება ამ მისიას - აკადემიის გზაზე მიმავალს, ინტერნეტი ნავიგაციაში ეხმარება, კომპასის მაგივრობას კი ფანჯრიდან დანახული ზღვა და მეზღვაურობის ოცნება უწევს.

გაიცანით ნიკა - თვითნასწავლი მუსიკოსი და ნამდვილი გიტარისი ლაგოდეხიდან!

18 წლის ნიკასთვის მუსიკალური ინსტრუმენტები ცხოვრების განუყოფელი ნაწილია. ბოლო 3 წლის განმავლობაში ფულს მხოლოდ ერთი მიზნისთვის - ელექტრო გიტარის საყიდლად - აგროვებდა და გამოუვიდა კიდეც. 2022 წელი ნიკასთვის ახალი ეტაპია - თბილისში გადმოდის და სჯერა, რომ თავისი ბენდის შექმნის ოცნებას ფრთებსაც შეასხამს. მხარში კი მისი მეგობრები, მუსიკალური ჯგუფი “რეზო და ბავშვები”, ამოუდგებიან. ლაგოდეხის ნაყინის ფესტივალზე ასობით მაყურებლის წინაშე მათთან ერთად ნიკამაც დაუკრა! სხვათაშორის, მუსიკას თავადაც წერს. 

ინტერნეტი ნიკასთვის მუდმივი სიახლეების წყაროა და მის მთავარ ინტერესებში ცოდნას სწორედ აქედან იღრმავებს. აღმოაჩინა ახალი თანამოაზრეები - მუსიკასთან ახლოს მყოფი ადამიანები. გვიყვება, რომ მთელი აბიტურიენტობის წელი ონლაინ მოუწია მასწავლებლებთან მომზადება და კომპიუტერის გარეშე სწავლა შეუძლებელი იქნებოდა.

ბავშვობიდან მსახიობობაც სურს. მიუხედავად იმისა, რომ ლაგოდეხში ამ მიმართულებით ვერ განვითარდა, ჰოლივუდში წასვლა გულში ოცნებად მაინც აქვს! თან, იმას ამბობს, რომ სცენაზე მუსიკოსის გარდა, მსახიობიც ვარო. 

შეიძლება ნიკას მუსიკალური განათლებით დაინტერესდით, თუმცა რამდენად დაუჯერებლადაც არ უნდა ჟღერდეს ნიკას არც მასწავლებელი ჰყოლია და არც აკორდების და ნოტების ცნობა იცის მუსიკალური სიმბოლოებით. ალბათ, საქმე ნიჭთან და აბსოლუტურ სმენასთან გვაქვს. 🤔 მოკლედ, ნიკას როკვარსვკლავობას ერთად დაველოდოთ!

18 წლის ნინი ლაგოდეხში ცხოვრობს და ბავშვობიდან ექიმობაზე ოცნებობს, თუმცა მას შემდეგ, რაც კომპიუტერი აქვს, ფოტოშოპსა და ილუსტრატორს დაეუფლა, შეკვეთებიც მიიღო და ფულიც გამოიმუშავა. 

ნინის თვლის, რომ ინტერნეტის დახმარებით საკუთარი თავის უკეთესი ვერსია გახდა - მისი ინტერესები მხოლოდ მედიცინით აღარ შემოიფარგლება. ფრილანსინგზე, სამსახურის ეფექტურ მოძიებაზე, ინტერიერის დიზაინსა და ვებდიზაინზე საგას ტრენინგები გაიარა. lingwing.com-ზე თურქული B1 დონეზე შეისწავლა და ჩინურზეც ვარჯიშობს - უკვე 20 იეროგლიფი იცის. 

წელს აბიტურიენტია და სამედიცინო უნივერსიტეტში ჩაბარებისთვის ემზადება - ქირურგობა ან პედიატრობა სურს. ძალიან მიზანდასახულია, თანაც ინტერნეტით მასალების მოძიება უადვილდება. ლეპტოპი მის პატარა ძმასაც ეხმარება. გვჯერა, რომ ნინი ინტერნეტსა და კომპიუტერს კიდევ ბევრჯერ გამოიყენებს სასარგებლოდ! 

სევერიანი ჩვენი ერთ-ერთი ყველაზე მონდომებული და ინტერესიანი ბენეფიციარია, რომელიც ინტერნეტით განათლების მიღებას აუცილებლად მოგანდომებთ! 

სევერიანი ჩართვიდან რეკორდულ დროში „მურწყუს“ ათასობით მოსწავლეს შორის კვირის და თვის ლიდერი რომ გახდა!  

ახალი რაღაცების სწავლა ყოველთვის უყვარდა, მაგრამ მას შემდეგ, რაც ინტერნეტი აქვს, დავალებასთან ერთად დამატებით ინფორმაციასაც იძიებს და გაკვეთილებს უფრო მრავალფეროვანს ხდის. ყველაზე მეტად ტექნიკური საგნები, გეოგრაფია და ისტორია აინტერესებს.

სწორედ ამ საგნების ოლიმპიადებმა მოახვედრა ბაქსვუდის საზაფხული ბანაკში, სადაც ინგლისურის გაუმჯობესებასთან ერთად უამრავი მეგობარი შეიძინა და როგორც ერთ-ერთი გამორჩეული ბანაკელი, ინგლისში წასვლითაც კი დაჯილდოვდა!

ვინმეს წლის დასაწყისში რომ ეთქვა, იმოგზაურებ და შენი საყვარელი ფეხბურთის გუნდის სტადიონზეც მოხვდებიო, არაფრით დაუჯერებდა, მაგრამ ეს ყველაფერი სულაც არ არის! წელს სევერიანმა საფრანგეთშიც იმოგზაურა „ჩართეს“ დონორების ორგანიზებულ თეატრალურ ფესტივალზე და სრულად მოინუსხა მოგზაურობის სიყვარულით. 

წელს სევერიანი აბიტურიენტია. წარმატებული სტუდენტი რომ გახდება, ამაში ეჭვი არავის გვეპარება, მაგრამ ძალიან გვაინტერესებდა, ამდენი ინტერესისა და გატაცების მქონე მოსწავლე რა მიმართულებას აირჩევდა. თურმე, ამ ყველაფერთან ერთად, ბავშვობიდან უყვარს ხატვა და საკმაოდ კარგადაც გამოსდის, მიუხედავად იმისა, რომ ხატვის წრეზე თავისი სოფლიდან ჩოხატაურში რეგულარულად ვერ ახერხებს სიარულს.

ჰოდა, სევერიანმა ხატვის, ტექნიკური საგნებისა და გეოგრაფიის იდეალური სინთეზი იპოვა - არქიტექტურა! ამბობს, რომ ერთი სული აქვს, ამ სფეროს საფუძვლიანად შესწავლას როდის დაიწყებს.

ჩვენ კი ერთი სული გვაქვს, მის დაპროექტებულ ქალაქებს როდის ვიხილავთ!

თამარი ჩვენი ყველაზე აქტიური ბენეფიციარია, რომელსაც უყვარს ადამიანებთან ურთიერთობა და უსამართლობის წინააღმდეგ ბრძოლას აპირებს.

არა, კი არ აპირებს, უკვე იბრძვის კიდეც. „რამდენიმე მასწავლებელმა გადაწყვიტა, რომ უზრდელი ვარ იმის გამო, რომ ხმამაღლა ვაფიქსირებ, როცა უსამართლობას ვხედავ. არ აქვს მნიშვნელობა, დიდია თუ პატარა, თუ ვხედავ, რომ ვიღაც სხვას ამცირებს, ან ცუდად ექცევა, ვერ ვითმენ, რომ არ ჩავერიო”. იმასაც დასძენს, რომ მსგავს სიტუაციებში გამოხატვის ფორმასაც აქვს მნიშვნელობა - „ძალიან იმპულსური ვარ, მაგრამ ვცდილობ, მოთმინებით ავუხსნა, რატომ მგონია მათი ქცევა არასწორი.”

უსამართლობასა და დანაშაულთან ბრძოლა პროფესიულად აქცია - იურიდიულზე ჩააბარა, რომ მერე გამომძიებელი ან აგენტი გახდეს. ადრე კადეტთა სკოლაში ჩაბარებაზე და ჯარისკაცობაზე ვფიქრობდი, მაგრამ მგონია, რომ ასე უფრო მეტი კარგი საქმის გაკეთებას მოვახერხებო, თუმცა იმასაც განიხილავს, რომ ერთიც გააკეთოს და - მეორეც. 

ახლა მოდელირებულ სასამართლო პროცესებში და სხვადასხვა ახალგაზრდულ პროექტშია ჩართული, რაც მომავალ იურიდიულ კარიერაშიც დაეხმარება. „ჩართეს“ გადაცემული კომპიუტერი და ინტერნეტი მეცადინეობის გარდა განსაკუთრებით სწორედ ამაში ადგება - ადრე ტელეფონში უწევდა ფაილების გადმოწერა და მუშაობა, მიმდინარე საორგანიზაციო საკითხებშიც ნაკლებად ახერხებდა ჩართვას და ინფორმირებულიც ნაკლებად იყო. ახლა მეტად მობილიზებულია და დროსაც უკეთ ანაწილებს.

ინტერნეტს თავისუფალ დროსაც იყენებს - ფილმების ყურება უყვარს, განსაკუთრებით ფსიქოლოგიური და დეტექტიური ჟანრის ფილმები მოსწონს. ჰგონია, რომ საკუთარი გამოცდილების გარდა ფილმებიც გვეხმარება ადამიანებთან ურთიერთობაში და მათი ქცევების უკეთ გაგებაში.

თამარი ფიქრობს, რომ როცა აქტიური ხარ, თავად ხდი შენს ცხოვრებას საინტერესოს. რაც უფრო მეტად გამოხატავ საკუთარ თავს, მით უფრო მეტმა ადამიანმა იცის შენი შესაძლებლობების შესახებ და გარშემოც უფრო მეტი ისეთი ადამიანი გყავს, რომელსაც შეგიძლია, დაეყრდნო. თამარს უყვარს ადამიანებთან ურთიერთობა. ის ფიქრობს, რომ ერთმანეთისადმი გამოხატული კეთილგანწყობა და ყურადღება, ჩვენ მიერ გაცემული დადებითი ემოციები ყოველთვის გვიბრუნდება უკან - შეიძლება, ცოტა გვიან, მაგრამ ყოველთვის. იხილეთ ვიდეო

ყველაფერი 2016 წელს დაიწყო, როცა სკოლაში სამ საინტერესო პროექტში ჩართვა შესთავაზეს. თორნიკე სამივეში გაწევრიანდა - სმარტ კლუბშიც, ჟურნალისტიკის წრეშიც და ევროკავშირის შესახებ პროექტშიც. სწორედ აქ მიხვდა, რომ ჟურნალისტიკა ძალიან იზიდავს და ასე დაიწყო: სასკოლო რადიო, გაზეთი, ინტერვიუები ცნობილ ადამიანებთან, ჟურნალისტებთან, ტელევიზიების “შიდა სამზარეულოში” შეხედვა, გადაცემის ჩაწერები, ტელევიზიაში საზაფხულო მოხალისეობა... 

ამ საქმიანობას აქამდე სკოლის კომპიუტერის დახმარებით მისდევდა, ხანდახან მეგობრების სახლებიდანაც მუშაობდა. ახლა მას უკვე საკუთარი კომპიუტერი აქვს და წარმოგიდგენიათ, რა ამბებს დაატრიალებს?!

ახლა საქართველოს საავიაციო უნივერსიტეტში სწავლობს, პარალელურად ესპანურისა და 3D დიზაინის შესწავლა სურს. საყვარელ საფრანგეთში კი კომპიუტერის მეშვეობით "დამოგზაურობს".

სკოლის პერიოდში თორნიკე პროექტს გაუძღვა, რომელმაც ჟურნალისტიკით დაინტერესებული ბავშვები გააერთიანა და საშუალება მისცა,  როგორც თეორიული, ისე პრაქტიკული განათლება მიეღოთ და სხვადასხვა სფეროს წარმომადგენლებთან გადაცემები ჩაეწერათ. თორნიკე განათლების ხელმისწავდომობის ქომაგია და ფიქრობს, რომ მსგავსი პროექტები ფინანსურ მოგებას არ უნდა ემსახებურებოდეს. მისი აზრით, უსამართლობაა, რომ  მათ, ვისაც განათლების მიღება სურთ, ფინანური დაბრკოლებების გამო ეს უფლება ეზუღდებათ.

თორნიკეს მომავალშიც დიდი გეგმები აქვს - საზღვარგარეთ უნდა სწავლის გაგრძელება, ჟურნალისტიკის გარდა მარკეტინგითაცაა დაინტერესებული, მუდმივად სიახლეების, ახალი პროექტებისა და ლექციების ძებნითაა დაკავებული და ეს ყველაფერი უკვე სახლიდან გაუსვლელად შეუძლია. იხილეთ სრულად

„მე ვარ მაია, 17 წლის. ამჟამად მეთერთმეტეკლასელი ვარ, ნახევრად აბიტურიენტი. მყავს 13 წლის ძმა, რომლის მეცადინეობის ტვირთიც მე ვიკისრე. ვცდილობ, სამაგალითო ადამიანი და მოსწავლე ვიყო და, რა თქმა უნდა, მშობლებისთვის საამაყო. მიყვარს ადამიანები, ახალი მეგობრები, საკმაოდ მალე შევდივარ ადამიანთან კონტაქტში. მიყვარს ცხოველები, მყავს ძაღლი, რომელსაც ზოი დავარქვი.

მიყვარს წიგნების კითხვა. თითოეული წიგნი მამოგზაურებს ახალ განზომილებაში, საიდანაც უსაზღვრო ემოციებით ვბრუნდები. საკმაოდ ემოციური ვარ, ამიტომაც არაა გასაკვირი, რომ ხშირად მიტირია წიგნის დასასრულზე საათობითაც კი. საერთოდ, წიგნებმა ითამაშა უდიდესი როლი ჩემს ფორმირებაში. ამჟამად ვკითხულობ ჰარპერ ლის წიგნს „ნუ მოკლლავ ჯაფარას“. ვთვლი, რომ ყველაზე ჰუმანური და კარგი წიგნია. 🎞 ძირითადად, ფილმები არ მიყვარს, თუმცა ამ ბოლო დროს ინტერნეტისა და კომპიუტერის საშუალებით წაკითხულ წიგნებზე გადაღებულ ფილმებს ვუყურებ, რაც ძალიან დიდი ემოციებით მავსებს და, ჩემი აზრით, საკმაოდ საინტერესოცაა, როგორ დაემთხვევა შენს გონებაში წარმოდგენილი სიუჟეტი ფილმის ეკრანიზაციას.

დღეს ანასტასიას (ტასოს) გაგაცნობთ - გამორჩეულად ხალისიან, ენერგიულ და მიზანდასახულ გოგოს!

ტასომ ბავშვობიდან იცოდა, რომ ხელში მაკრატელი უნდა სჭეროდა - თავიდან სამოსის დიზაინრობა უნდოდა, შემდეგ კი - სტილისტობაც. წელს სკოლას ამთავრებს და შეუძლია, ბავშვობის ოცნებები სერიოზულ კარიერულ გეგმად აქციოს და პროფესიული სტილისტი გახდეს (ვინ იცის, იქნებ - დიზიანერიც). 

უკვე გადაწყვიტა, რომელ კოლეჯში შეიტანს საბუთებს, მანამდე კი დროს არ კარგავს - youtube-ის ვიდეობით ეუფლება სხვადასხვა ტექნიკას, მერე კი ოჯახის წევრებზე ატარებს ექსპერიმენტებს. მოკლედ, საოცრად მონდომებულია და მისი ხელმარჯვეობითაც ყველა ძალიან კმაყოფილია!

ტასო სულ ახლახანს დაგვიბრუნდა საფრანგეთიდან, თეატრალური ფესტივალითა და მასპინძლებით აღფრთოვანებული და მოგზაურობაზე შეყვარებული! ის და ჩვენი სამი ბენეფიციარი „ჩართეს“ ფრანგული პარტნიორისა და დონორის (Secours populaire du rhone) დაფინანსებით გავამგზავრეთ. როგორც ჯგუფის დანარჩენმა წევრებმა გვიამბეს, ტასომ ყველა თავისი ორგანიზებულობითა და მობილიზებულობით მოხიბლა. დარწმუნებულები ვართ, ეს თვისებები ძალიან გამოადგება, როცა საკუთარ სალონს გახსნის! იხილეთ სრულად

მარეხი 2020 წელს ჩავრთეთ -  სწორედ მაშინ, ყველაფერი რომ გაჩერდა და პროდუქტიულობის, სამყაროსთან წვდომის ერთადერთ საშუალებად ინტერნეტი რომ დაგვრჩა. ამ დროს მარეხი აბიტურიენტი იყო და ინტერნეტი რომ არა, ვერც გაკვეთილებს დაესწრებოდა, ვერც გამოცდებისთვის მოემზადებოდა და მისი აზრით, ვერც სტუდენტი გახდებოდა. ხანის აკადემიასთან ერთად მისი სკოლის ყველა მასწავლებელმა უეცრად ვირტუალურ რეალობაში გადაინაცვლა. მარეხმაც ბეჯითად გამოიყენა ყველა ონლაინ რესურსი, ტესტი და გაკვეთილი და დღეს ახალი ცხოვრებით ცხოვრობს  - უკვე სტუდენტია. 

მარეხი მომავალი არქიტექტორია. გოეთეს ეთანხმება, რომ არქიტექტურა დროში გაყინული მუსიკაა და ცდილობს, რაც შეიძლება მეტ “ნაწარმოებს” გაეცნოს, მეტი იმოგზაუროს - თუნდაც ვირტუალურად და შთაბეჭდილებები პროფესიულ შთაგონებად აქციოს. ვინაიდან მასალების უმეტესობა ინგლისურადაა, მარეხი ინგლისურშიც აქტიურად მეცადინეობს - ხან აპლიკაციების დახმარებით, ხანაც თუნდაც ფილმების ინგლისურად ყურებით. 

სწავლის გაგრძელება იტალიაში უნდა, რაც, ალბათ, არქიტექტურის ყველა სტუდენტის ოცნებაა. მაგრამ მარეხი მხოლოდ ოცნებით არ შემოიფარგლება - ინგლისურთან ერთად, იტალიურსაც სწავლობს და ერთი სული აქვს, როდის ექნება საშუალება, პირადადაც ნახოს ხელოვნების ის ნიმუშები, რომლებსაც ვირტუალურად უკვე კარგად იცნობს.