ჩართე

ბარბარე უკანა ფშავის, პაწაწინა, მიყრუებულ სოფელში ცხოვრობს, თუმცა ეს მას ხელს არ უშლის, ქვეყნის უმნიშვნელოვანეს პროცესებში ჩაერთოს. Facebook-ის მეშვეობით, ბარბარე ხან ანტისაოკუპაციო მოძრაობას ეხმიანება, ხან ტურისტებს ეპატიჟება, ხანაც საერთაშორისო მედიას განიხილავს. არც კი ვიცით, როგორ ასწრებს - ამჟამად ერთიანი ეროვნული გამოცდებისთვის ემზადება. სურს, საზოგადოებას მეტი სარგებელი მოუტანოს - GLOW-ს ბანაკში მონაწილეობის შემდეგ არაერთ ახალგაზრდულ ლექციას აორგანიზებს, რომელიც უფროსებშიც პოპულარობით სარგებლობს. იხილეთ მეტი

ხატია თეთრიწყაროში ცხოვრობს, მანგლისის რაიონში. დარდობდა, რომ მანგლისის შესახებ ბევრ ადამიანს ინფორმაცია არ აქვს, და ამიტომ Facebook-ზე გახსნა გვერდი დაბა მანგლისი, რომლის საშუალებითაც უკვე 2000-მდე ადამიანმა გაიგო უფრო მეტი მანგლისზე, ხატიასა და მისი მეგობრების წყალობით კი 50-მდე ადამიანი კი კოტეჯის მეპატრონეებს დაუკავშირდა და მანგლისში დასასვენებლად წავიდა. ხატიას სამართლის სწავლა და კრიმინალთან ბრძოლა აქვს გადაწყვეტილი. სანამ უნივერსიტეტში ჩააბარებს, ინტერნეტით ინგლისურს სწავლობს და ინფორმაციას ონლაინ ეცნობა.

თამარი აპირებს, უსამართლობის წინააღმდეგ იბრძოლოს. „თუ ვხედავ, რომ ვინმეს ამცირებენ, ვერ ვითმენ, რომ არ ჩავერიო”. თამარს იურიდიულზე უნდა ჩაბარება, რომ გამომძიებელი ან აგენტი გახდეს. ადრე ჯარისკაცობაზე ვფიქრობდი, მაგრამ მგონია, რომ ასე უფრო მეტი კარგი საქმის გაკეთებას მოვახერხებო. ინტერნეტი ახალგაზრდულ პროექტებში ჩართვაში და დროის უკეთ განაწილებაში ეხმარება. უყვარს ფსიქოლოგიურ-დეტექტიური ჟანრის ფილმები და ფიქრობს, რომ ჩვენ მიერ გაცემული ემოციები ყოველთვის გვიბრუნება უკან - შეიძლება, გვიან, მაგრამ ყოველთვის. იხილეთ ვიდეო

იაკობი ჩვენი ერთ-ერთი პირველი ბენეფიციარია. დღეს ის არც მეტი, არც ნაკლები, წარმატებული გრაფიკული დიზაინერია! პრინციპში, იმდენად რთულ დავალებებს ასრულებს, გადავწყვიტეთ, Chromebook-ის მაგივრად Desktop კომპიუტერი გადაგვეცა. Photoshop-ი და Illustrator-ი, ცხადია, ონლაინ ისწავლა. თანაც, მისი ინტერესები ამით არ მთავრდება! ის მანქანებითა და მექანიკოსის საქმიანობითაა გატაცებული - ცხადია, ამ სფეროში დახელოვნებისთვისაც ინტერნეტს იყენებს. იაკობი ფიქრობს, რომ ინტერნეტი განვითარებასა და თვითრეალიზებაში ეხმარება. იხილეთ სრულად

გაიცანით გიორგი - მომავალი მზარეული! წელს სკოლას ამთავრებს და ინტერნეტის წყალობით კოლეჯის შესახებ ინფორმაცია, საჭირო საბუთები, აპლიკაცია მოამზადა და სექტემბრიდან კულინარიულ კოლეჯში ისწავლის.  სანამ პროფესიონალი მზარეული გახდება, სახლში ექსპერიმენტებს ატარებს. რეცეპტებს, კულინარიულ რჩევებსა და სტატიებს ჯანსაღ კვებაზე ინტერნეტით იძიებს და სწავლობს. „ჩართეს“ წყალობით გიორგის რომანტიკული ამბავიც გადახდა - ერთმანეთი „ჩართეს“ ორგანიზებულ ტრენინგზე გაიცნეს, ძალიან მოეწონათ და რაღაც ხანი ურთიერთობაც კი ჰქონდათ. იხილეთ სრულად

თორნიკე მომავალი ჟურნალისტია. ხან სასკოლო რადიოში მუშაობს, ხან ტელევიზიებში მოხალისეობს. თან პროექტს უძღვება, რომელიც ჟურნალისტიკით დაინტერესებულ ბავშვებს აერთიანებს და განათლების მიღებაში ეხმარება. თორნიკე განათლების ხელმისწავდომობის ქომაგია და ფიქრობს, რომ მსგავსი პროექტები ფინანსურ მოგებას არ უნდა ემსახებურებოდეს. ამ საქმიანობას აქამდე სკოლის კომპიუტერის დახმარებით მისდევდა, ხანდახან მეგობრების სახლებიდანაც მუშაობდა. ახლა მას უკვე საკუთარი კომპიუტერი აქვს და წარმოგიდგენიათ, რა ამბებს დაატრიალებს?! იხილეთ სრულად

თორნიკე ჩვენი ერთ-ერთი პირველი ბენეფიციარია წეროვნის დევნილთა დასახლებიდან. დღეს ის უკვე პირველი კურსის სტუდენტია - საქართველოს უნივერსიტეტში სწავლობს, სამართლის ფაკულტეტზე. სამართლის ფაკულტეტზე რომ მოხვდა, ეს მხოლოდ მისი მონდომების დამსახურებაა - მისი და ინტერნეტის. ერთიანი ეროვნული გამოცდებისთვის ძირითადად თავისით მოემზადა - რესურსებს ონლაინ ეძებდა, გამოცდის სტრუქტურას სწავლობდა, ტესტებს აკეთებდა, სხვადასხვა ფორუმებს ეცნობოდა. მოკლედ, თვითდისციპლინა, მონდომება, ცოტა ინტერნეტის მაგიური ძალა და ყველაფერია შესაძლებელი. იხილეთ სრულად

თამარი პროფესიული მოკრივეა. გარდა იმისა, რომ ინტერნეტის მეშვეობით ეროვნული გამოცდებისთვის ემზადება, განათლებას იღებს და საშინაო დავალებებს ასრულებს, კომპიუტერს ტექნიკის გასაუმჯობესებლადაც იყენებს - ის Youtube-სა და სხვა რესურსებზე კრივს ადევნებს თვალს! გადაწყვეტილი აქვს, რეაბილიტატორი გამოვიდეს და, ცხადია, აპირებს, კარიერულ წინსვლაში ინტერნეტიც დაიხმაროს. „ინტერნეტი — ესაა წვდომა ულევ ინფორმაციასთან, დღევანდელ სამყაროში კი ცოდნა ყველაფერია“. 

მზია ოზურგეთში, დაბა ნასაკირალში, სწავლობს. თუ ჰკითხავთ, რა გაინტერესებსო, ალბათ, მთელი დღე მოუნდება საკუთარი გატაცებების ჩამორიკრიკებას. არქეოლოგიაც აინტერესებს, პოლიტიკაც, გეოგრაფიაც, სპორტიც, სოფლის მეურნეობაც… თავისუფალ დროს წიგნებს კითხულობს. კინემატოგრაფიაც იტაცებს, თუმცა აქამდე ფილმებს მხოლოდ ტელევიზორში თუ ნახავდა. მზიას დიდი გეგმებიც აქვს. ზუსტად არ იცის, პროფესიით რა გამოვა, მაგრამ ძალიან უნდა, რომ ადამიანებს დაეხმაროს. რეგიონებში სოფლის მეურნეობის გაუმჯობესება სურს, ქალაქებში - ხეების დარგვა.

ბაგრატი აბიტურიენტია და ბიზნესსა და ეკონომიკაზე სწავლას აპირებს, რომ აუდიტორი ან ბუღალტერი გამოვიდეს. ახალი კომპიუტერითა და ინტერნეტით გამოცდებისთვის ემზადება და ინგლისურს სწავლობს. ბაგრატი ინტროვერტია - თავისუფალ დროს სახლში დარჩენა, კითხვა და ფილმების ყურება ურჩევნია. ბუნებაში სეირნობა და არქიტექტურაზე დაკვირვებაც სიამოვნებს. კიდევ ერთი ძალიან საინტერესო ჰობი აქვს - ქაღალდისგან ნაირ-ნაირ ნაკეთობებს ქმნის - Youtube-ზე ვიდეობს უყურებს და სწავლობს. უკვე ისე გაიწაფა, რომ თვითონაც შეაქვს კორექტივები ფიგურების დიზაინში. იხილეთ სრულად

მარიამი აბიტურიენტია. მიუხედავად იმისა, რომ ურჩიეს, რამე უფრო პრაქტიკული ესწავლა, გადაწყვიტა, რომ მისი მოწოდება ფსიქოლოგობაა. ფიქრობს, რომ იმ საქმის კეთება, რომელიც უყვარს, ბევრად უფრო დიდ ბედნიერებას მოუტანს. ზუსტად არ იცის, ფსიქოლოგიის რა მიმართულებას აირჩევს, მაგრამ ბავშვებთან მუშაობა უნდა. „ჩართეს“ კომპიუტერი წელს განსაკუთრებით ეხმარება - გამოცდებისთვის ემზადება, ინგლისურს სწავლობს. აპირებს, მაგისტრატურაზეც წავიდეს -  მოკლედ, დიდი გეგმები აქვს. ცოტას ნერვიულობს, მაგრამ ცდილობს, ეს ნერვიულობის ჟრუანტელი მონდომებად აქციოს. იხილეთ სრულად

ეკას ეკოლოგია იტაცებს. როგორც კი თავისუფალ დროს გამონახავს, ეკოლოგიაზე წიგნებსა და სტატიებს კითხულობს. მომავალში აპირებს, ეს სფერო პროფესიულად შეისწავლოს და იმედი აქვს, ეკოლოგიური პრობლემების მოგვარებაში თავადაც შეიტანს მცირედ წვლილს. ეკა, ასევე, ფოტოგრაფია. ფოტოების გადაღება ყველაზე მეტად შემოდგომაზე უყვარს - საკუთარ კოლექციას ნაირ-ნაირი ფერებით ამდიდრებს. ფიქრობს, რომ ინტერნეტი მას ცნობიერების ამაღლებაში ეხმარება. იხილეთ სრულად

მაია მე-11 კლასშია, თითქმის აბიტურიენტი. ხან 13 წლის ძმას ამეცადინებს, ხან კი საკუთარი გამოცდებისთვის ემზადება. უყვარს კითხვა, ბოლო დროს კი წაკითხული წიგნების ეკრანიზაციის ყურებითაა გატაცემული. ფიქრობს, რომ ინტერნეტი მისი ცხოვრების განუყოფელი ნაწილია. „ზოგადად, როცა რაღაც არ ვიცი, ძალიან მრცხვენია, ამიტომაც ვცდილობ, ყველაფერი მოვიძიო ინტერნეტის საშუალებით, წავიკითხო და დავიმახსოვრო.“ მომავალში სწავლის გაგრძელებას აპირებს და სურს, საზოგადოებაში მაქსიმალურად დიდი წვლილი შეიტანოს. თვლის, რომ მისი ადგილი სასამართლო დარბაზშია.

სევერიანი ჩვენი ერთ-ერთი ყველაზე ინტერესიანი ბენეფიციარია, რომელიც ინტერნეტით განათლების მიღებას აუცილებლად მოგანდომებთ! ჩართვიდან რეკორდულ დროში „მურწყუს“ ათასობით მოსწავლეს შორის კვირის და თვის ლიდერი გახდა! ონლაინ მეცადინეობის შედეგად ბაქსვუდის საზაფხული ბანაკშიც მოხვდა და როგორც ერთ-ერთი გამორჩეული ბანაკელი, ინგლისში წასვლითაც კი დაჯილდოვდა! სევერიანმა საფრანგეთშიც იმოგზაურა „ჩართეს“ დონორების ორგანიზებულ თეატრალურ ფესტივალზე. წელს აბიტურიენტია და აპირებს, არქიტექტურა შეისწავლოს. იხილეთ სრულად